އެތްލެޓިކޯ ބަލިކޮށް ކޮޕަ ޑެލްރޭ ފައިނަލުން ބިލްބާއޯ ޖާގަ ހޯދައިފި

ކޮޕާ ޑެލްރޭ ފުޓްބޯޅަ މުބާރާތުގެ ސެމީ ފައިނަލުގެ ދެވަނަ މެޗުގެ ދެވަަނަ ލެގުގައި ބުރާސްފަތި ދުވަހުގެ ރޭ އަމިއްލަ ދަނޑުގައި 3-0 ގެ ނަތީޖާއަކުން އެތްލެޓިކޯ މެޑްރިޑް ބަލިކޮށް އެތްލެޓިކް ބިލްބާއޯ އިން މުބާރާތުގެ ފައިނަލުން ޖާގަ ހޯދައިފި އެވެ.

މިދެޓީމު އެތްލެޓިކޯ މެޑްރިޑްގެ ދަނޑުގައި ކުޅުނު ފުރަތަަމަ ލެގުގެ މެޗު 1-0 ގެ ނަތީޖާއަކުން ބިލްބާއޯ އިން ކާމިޔާބުކޮށްފައިވާއިރު، މިނަތީޖާއާއެކު އެޓީމަށް ފައިނަލުން ޖާގަ ލިބުނީ 4-0 ގެ އެގްރިގޭޓް ނަތީޖާއަކުންނެވެ.

މިމެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ އެތްލެޓިކޯ މެޑްރިޑުން މެޗު ޑޮމިނޭޓުކުރި ނަމަވެސް މި ހާފުގައި އެތްލެޓިކޯގެ ގޯލާއި އަމާޒުކޮށް ބިލްބާއޯ އިން ފޮނުވާލި ދެ ހަމަލާގައި އެޓީމުން ވަނީ ދެލަނޑު ކާމިޔާބުކޮށްފައެވެ.

އެގޮތުން އެޓީމުގެ ފުރަތަަމަ ލަނޑު މެޗު 13 ވަނަ މިނެޓުގައި ކާމިޔާބުކޮށްދިނީ އެޓީމުގެ އިނާކީ ވިލިއަމްސް އެވެ. މިއީ އެޓީމުގެ ޒުވާން ފޯވާޑް ނިކޯ ވިލިއަމްސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އެޓީމުން ލީޑު ފުޅާކުރި ލަނޑު ފުރަތަމަ ހާފުގެ 42 ވަނަ މިނެޓުގައި ކާމިޔާބުކޮށްދިނީ ނިކޯ ވިލިއަމްސް އެވެ.

މިއީ އެޓީމުގެ އިނާކީ ވިލިއަމްސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އެތްލެޓިކް ބިލްބާއޯ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. އަދި މިމެޗުގައި ބިލްބާއޯގެ ތިންވަނަ ލަނޑު ދެވަނަ ހާފުގެ 61 ވަނަ މިނެޓުގައި ކާމިޔާބުކޮށްދިނީ އެޓީމުގެ ސްޕެނިޝް ފޯވާޑް ގޯކާ ގުރުޒެޓާ އެވެ.

މިލަނޑާއެކު މެޗުގެ ކުޅުން ނިމިގެންދިޔައީ 3-0 ގެ ނަތީޖާއަކުން ބިލްބާއޯ ކުރީގައި އޮވެގެންނެވެ. އަދި މުބާރާތުގެ ފައިނަލްގައި އެޕްރިލް 6 ވަނަ ދުވަހު އެތްލެޓިކް ބިލްބާއޯ އިން ނުކުންނާނީ މަޔޯކާއާއި ދެކޮޅަށެވެ.