ފޮރެސްޓު ބަލިކޮށް ޔުނައިޓެޑުން 10 އަހަރުތެރޭގައި 9 ވަނަ ފަހަރަށް އެފްއޭކަޕްގެ ކުއާޓާ ފައިނަލުން ޖާގަ ހޯދައިފި

އިގިރޭސި އެފްއޭކަޕްގެ ރައުންޑް އޮފް 16 ގައި ބުދަދުވަހުގެ ރޭ ރަށުން ބޭރުގައި ވާދަވެރި ކުޅުމަކަށްފަހު 1-0 ގެ ނަތީޖާއަކުން ނޮޓިންހަމް ފޮރެސްޓް ބަލިކޮށް މެންޗެސްޓާ ޔުނައިޓެޑުން މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ.

މިއީ މިމުބާރާތުގެ ކުއާޓާ ފައިނަލުން މެންޗެސްޓާ ޔުނައިޓެޑް ޖާގަ ހޯދި 48 ވަނަ ފަހަރެވެ. އަދި ފާއިތުވެދިޔަ 10 އަހަރު ތެރޭގައި އެޓީމު ކުއާޓާ ފައިނަލުން ޖާގަ ހޯދި 9 ވަނަ ފަހަރެވެ.

މިދެޓީމު އެންމެ ފަހުން ކުޅުނު މެޗު 2-1 ގެ ނަތީޖާއަކުން ފޮރެސްޓުން ކާމިޔާބުކޮށްފައިވާއިރު، މިމެޗުގެ ފުރަތަމަ ހާފުގައި ދެޓީމުގެ ފަރާތުން ފެނިގެންދިޔައީ ދާދި ހަމަހަމަ ކުޅުމެކެވެ. އެގޮތުން މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ.