ޣައްސާން ހާޒިރުކުރި 241 ކޮމެޓީގެ ބައްދަލުވުން ސިއްރުކޮށްފި

ރައްޔިތުންގެ މަޖިލިހުގެ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ) އަށް ޑިފެންސް މިނިސްޓަރ ޣައްސާން މައުމޫން ހާޒިރު ކުރި ބައްދަލުވުން ސިއްރުކޮށްފިއެވެ.

ޣައްސާން މަޖިލީހުގެ 241 ކޮމިޓީއަށް ހާޒިރުކޮށްފައިވަނީ ދިވެހިރާއްޖޭގެ ކަނޑުގެ ސަރަހައްދަށް އިންޑިއާ ސިފައިން ހަތިޔާރާއެކުވަދެ ރާއްޖޭގެ މަސްއޮޑިތަކަށް އަރާފައިވާ މައްސަލައާއި ޖާސުސީ މައުލޫމާތު އެއްކުރާ އުޅަނދުފަހަރު ރާއްޖޭގެ ސަރަހައްދާ ކައިރީގައި އުޅެމުންދާކަމަށް މީޑިއާގައި ހިއްސާކުރަމުންދާތީ އެ މައްސަލަތަކުގައި ސަރުކާރުން އަމަލުކުރަމުންދާގޮތް ބަލައިދިނުމަށްއެދި ހުށަހަޅާފައިވާ މައްސަލައާ ގުޅިގެންނެވެ.

އެ މައްސަލައިގައި ކޮމިޓީ ބައްދަލުވުން އެޖެންޑާ ކުރީ މިއަދު ހެނދުނެވެ. އެ ބައްދަލުވުމާ ގުޅިގެން ޑިފެންސް މިނިސްޓްރީން މަޖިލިހުގެ ކޮމިޓީ އަށް ސިޓީއެއް ވެސް ފޮނުވިއެވެ. ކޮމިޓީން ނިންމާފައިވަނީ އެ ސިޓީއާއި އެ ބައްދަލުވުން ސިއްރުކުރުމަށެވެ.

އިންޑިއާ ސިފައިން ރާއްޖޭގެ މަސްބޯޓުތަކަކަށް އެރި ކަމަށް ބުނާ މައްސަލާގައި ޑިފެންސް މިނިސްޓްރީން މީގެކުރިން ނެރުނު ބަޔާނެއްގައި ބުނެފައިވަނީ ރާއްޖޭގެ ހާއްސަ އިގްތިސާދީ ސަރަހައްދުގެ ތެރޭގައި މަސްވެރިކަން ކުރަމުންދިޔަ ރާއްޖޭގެ މަސްދޯނިތަކަށް އަރާފައިވަނީ އިންޑިއާގެ ކޯސްޓްގާޑު ޝިޕް 246 އަދި އިންޑިއާ ކޯސްޓްގާޑް ޝިޕް 253 އަށް ނިސްބަތްވާ ބޯޑިން ޓީމުތަކަކުން ކަމަށެވެ.

ރާއްޖޭގެ ހާއްސަ އިގްތިސާދީ ސަރަހައްދުގައި މަސްވެރިކަން ކުރަމުންދިޔަ ދިވެހި މަސްދޯނިތަކަށް ރާއްޖޭގެ ކަމާގުޅޭ އެއްވެސް އިދާރާއަކާ ކޯޑިނޭޓް ކުރުމެއް ނެތި ބައިނަލްއަގުވާމީ ކަނޑުގެ ގާނޫނުތަކާއި އުސޫލުތަކާ ހިލާފަށް އިންޑިއާގެ އަސްކަރިއްޔާ އިން ހިންގި އޮޕަރޭޝަންގެ ތަފްސީލު ދިނުމަށް ރާއްޖޭގެ ހާރިޖީ ވުޒާރާ މެދުވެރިކޮށް އިންޑިއާ ސަރުކާރުގައި ރަސްމީކޮށް ދަންނަވާފައިވާނެ ކަމަށް ޑިފެންސް މިނިސްޓްރީން ބުނެފައިވެއެވެ. ނަމަވެސް އަދި މިހާތަނަށް އެމައުލޫމާތު އިންޑިއާ ސަރުކާރުން ދިވެހި ސަރުކާރަށް ފޯރުކޮށްދީފައިވާކަން ހާމަކޮށްފައެއް ނުވެއެވެ.

ޖާސުސީ މައުލޫމާތު އެއްކުރާ އުޅަނދުފަހަރު ރާއްޖޭގެ ސަރަހައްދާ ކައިރީގައި އުޅެމުންދާކަމަށް ބުނެ ދާދި ފަހުން އަޑު ފެތުރިފައިވަނީ ޗައިނާގެ ބޯޓެއްގެ މައުލޫމާތެވެ. އެގޮތުން ކަނޑު ދިރާސީ ކުރާ ޗައިނާ ބޯޓު އިންޑިއާ ކަނޑާއި ރާއްޖޭގެ ކަނޑުގެ ސަރަހައްދުގައި ހަރަކާތްތެރިވަމުން ދިޔަ ކަމަށްބުނާ ނެވިގޭޝަން މެޕެއް ދާދި ފަހުން ވަނީ މީސް މީޑިއާގައި ދައުރުވެފައި އެވެ.