ރޯދަ މަހަށް ތައްޔާރުވުމަށް ޝައުބާން މަހު ރޯދަ ހިފުން މުހިންމު - ހުތުބާ

ރޯދަމަހަށް ތައްޔާރުވުމަށް ޝައުބާން މަހު ސުންނަތް ރޯދަ ހިފުމަކީ ކޮންމެހެން ބޭނުންތެރި ކަމެއް ކަމަށް މިއަދުގެ ހުކުރު ހުތުބާގައި ބުނެފި އެވެ.

މިއަދުގެ ހުތުބާ އަލި އަޅުވާލާފައިވަނީ "شَعْبَان މަހާއި ހެޔޮޢަމަލު ކުރުން" މި މައުޟޫގެ މައްޗަށެވެ.

ހުތުބާގައި ބުނެފައިވަނީ شَعْبَان މަހަކީ އެއްގޮތަށްވުރެ ގިނަ ގޮތްގޮތުން ހާއްސަވެގެންވާ މަހެއް ގޮތުގައެވެ. އޭގެތެރޭގައި އެމަހަކީ، رَمَضَانމަހަށް މަރްޙަބާ ކިޔަމުން އަންނަ މަހަށްވުން ހިމެނޭކަމަށް ބުނެފައިވެއެވެ.

ހުތުބާގައި ބުނެފައިވަނީ، ޞިއްޙީ ގޮތުންނާއި ޢުމުރުގެ ގޮތުން، އެކިމީހުންގެ ޙާލަތު ތަފާތު ކަމަށެވެ. އެހެންކަމުން އެމީހަކަށް ކުޅަދާނަވީ މިންވަރަކުން ހެޔޮ ޢަމަލު ކުރުމުގައި ދެމިހުރުމަށް ހުތުބާގައި ވަނީ ހަނދާންކޮށްދީފައެވެ. އެހެންކަމުން ގައިގައި ބާރު ހުއްޓައި ހެޔޮ ކަންތައްތަކާއި ހެޔޮ އަމަލުކުރުމުގައި އަވަދިނެތި އުޅެވޭތޯ މަސައްކަތް ކުރުމަށް މިއަދުގެ ހުތުބާގައި ވަނީ ގޮވާލާފައެވެ.

ުސުވަރުގެއަށް ދިޔުމަށް މަގުކޮށާކަމުގައި ވާނަމަ، ކީރިތި ޤުރްއާނާއި މާތް ނަބިއްޔާ صلى اللّه عليه وسلم ގެ ސުންނަތަށް ޢަމަލު ކުރުމަށް މިއަދުގެ ހުތުބާގައި ވަނީ ނަސޭހަތްތެރިވެފައެވެ. ތިމަންނައަށް ނޭނގެއޭ ބުނެ ބަރަކާތާއި ރަޙްމަތުގެ ދުވަސްތައް ނަގައި ނުލާ، ދަންނަ މީހުންކުރެ އަހައި އޮޅުންފިލުވުމަށްވެސް ވަނީ ނަސޭހަތްތެރިވެފައެވެ.