އިންވެސްޓް މޯލްޑިވްސްގެ ދެވަނަ ފޯރަމް ދުބާއީގައި

އިންވެސްޓް މޯލްޑިވްސް ފޯރަމްގެ ދެވަނަ ފޯރަމް މިމަހުގެ 13 ވަނަ ދުވަހު ދުބާއީގައި ފެށުމަށް ތައްޔާރުވެއްޖެ އެވެ.

މުޅި ދުނިޔޭގައިވެސް ވިޔަފާރީގެ މުހިއްމު ހަބެއްގެ ގޮތުގައި ތަރައްޤީވެފައިވާ ދުބާއީގައި ބާއްވާ މިފޯރަމް ބޭއްވުމަށް ހަމަޖެހިފައިވަނީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ޔޫއޭއީއަށް ކުރައްވާ ރަސްމީ ދަތުރުފުޅުތެރޭގައެވެ. ރައީސްގެ މި ދަތުރުފުޅުގައި ސަރުކާރުގެ މަތީފަންތީގެ ބޭފުޅުން ބައިވެރިވެވަޑައިގަންނަވާނެ އެވެ.

އިންވެސްޓް މޯލްޑިވްސްގެ ފުރަތަމަ ފޯރަމް ބާއްވާފައިވަނީ ޗައިނާގައެވެ. މި ފޯރަމްވެސް އެގައުމުގައި ބާއްވާފައިވަނީ ރައީސް މުއިއްޒު އެގައުމަށް ކުރެއްވި ރަސްމީ ދަތުރުފުޅުގެ ތެރެއިންނެވެ. ޗައިނާގައި ބޭއްވުނު ފޯރަމްގައިވެސް ގިނަ އަދަދެއްގެ އިންވެސްޓަރުން ބައިވެރިވެފައިވާއިރު ދުބާއީގައި ބާއްވާ ފޯރަމްގައިވެސް ގިނަ އަދަދެއްގެ އިންވެސްޓަރުން ބައިވެރިވާނެ ކަމަށް ސަރުކާރުން ބުނެއެވެ.

ޔޫއޭއީގެ އެންމެ މަޝްހޫރު އެއް ބިނާ "ބުރުޖް އަލް ޢަރަބް"ގައި މިމަހުގެ 13ވަނަ ދުވަހު ބާއްވާ މި ފޯރަމުގައި ރާއްޖެއާއި ބައިނަލްއަޤްވާމީ އިންވެސްޓަރުން ހިމެނޭހެން 300އަށްވުރެ ގިނަ އިންވެސްޓަރުން ބައިވެރިވާނެއެވެ. އޭގެ ތެރޭގައި ޔޫއޭއީގެ ޝާހީ އާއިލާގެ ވިޔަފާރިތަކާ ގުޅުންހުރި އިންވެސްޓަރުންނާއި އޯނަރުންވެސް ހިމެނެއެވެ.