ކެންސަރު ބައްޔަށް ފަރުވާ ހޯދަމުންދާ މީހަކަށް އެހީތެރިވުމަށް ޑރ ޝަހީމް ކުރެއްވި މަސައްކަތަށް އެމީހާގެ ޝުކުރު

އޮސްޓޯގޮނިކް ސާކޯމް ކެންސަރު ޖެހިފައިވާ މާލެ ސިޓީގެ އިމާމް އަދި ޖަމާޢަތްތެރިކަންވެސް ކުރައްވަމުން ގެންދަވާ މުހައްމަދު ޖަވާދު އާދަމް އަށް ކެންސަރު ބަލި ޖެހި ފަރުވާދެމުންދާކަން އިސްލާމީ ކަންތައްތަކާ ބެހޭ ވަޒީރު ޑރ މުޙައްމަދު ޝަހީމް އަލީ ސައީދު އެނގިލެއްވުމުން ޖަވާދުއަށް ގުޅައި އެހީތެރިވުމަށް ކުރެއްވި މަސައްކަތް ފާހަގަކޮށް ހިތުގެ އެންމެ ފުންމިނުން ޑރ ޝަހީމްއަށް ޖަވާދު ޝުކުރު އަދާކުރައްވައިފިއެވެ.

ޖަވާދުގެ ފޭސްބުކްގައި ކުރެއްވި ޕޯސްޓެއްގައި ވަނީ, އިސްލާމީ ކަންތައްތަކާ ބެހޭ ވަޒީރަކަށް އެންމެ ގާބިލު ވަޒީރަކީ ޑރ ޝަހީމް ކަމާމެދު ދެބަސްވާނެ އެއްވެސް ދިވެހި ރައްޔިތަކު ނުހުންނާނެކަން ފާހަގަކުރައްވާފައެވެ. އެގޮތުން ޖަވާދުއާ ދިމާވި ހާލަތުގައި ޑރ ޝަހީމް އޭނާއަށް އެތައް ފަހަރަކު ގުޅުއްވައި ކުރެއްވި މަސައްކަތްޕުޅު ފާހަގަކޮށް ޖަވާދު ކުރެއްވި ޕޯސްޓުގައި ވަނީ ޑރ ޝަހީމަށް ޝުކުރު އަދާކުރައްވާފައެވެ.

ޖަވާދު ކުރެއްވި ޕޯސްޓުގައި ވަނީ, މަތީ މަޤާމް ލިބުނީމަށް މީހަކު ކަމަކު އެދިގެން ގުޅި ކަމުގައި ވީނަމަވެސް ގިނަ ބަޔަކަށް އެއީ ދަންނަ މީހަކު އަދި ގިނަ ބަޔަކު ފޯނަށް ޖަވާބު ނުދެއްވާކަން ފާހަގަކޮށްފައެވެ. ނަމަވެސް ޑރ ޝަހީމުގެ ކިބައިގެން ފެނިގެންދިޔައީ އެއަށްވުރެ އޯގާތެރި ހައިރާން ކުރަނިވިކަމެއް ކަމަށް ޖަވާދު ފާހަގަކުރެއްވިއެވެ.

އަދި އެހީތެރިކަމަށް އެދި ސަރުކާރުގެ މުވައްސަސާތަކަށް ހުށަހަޅާފައިވާކަން ޑރ ޝަހީމްގެ އަރިހުގައި ދެންނެވި ކަމަށާއި, އެކަންކަން ބައްލަވައިދެއްވާނެކަމުގެ ޔަގީންކަން ދެއްވައި އެމަނިކުފާނުގެ ބެއްލެވުުމުގެ ދަށުން ޒަކާތު ފަންޑުން ވަނީ ކޮންމެސް އެހީގެ މިންވަރެއް ހަމަޖައްސަވާ ދެއްވާފައިވާކަން ޖަވާދު ފާހަގަކުރައްވާފައިވެއެވެ.

އަދި މިހާލަތުގައި ޑރ ޝަހީމްގެ ބެއްލެވުމުގެ ދަށުން ވެދެއްވާފައިވާ އެހީތެރިކަމަކީ ވެވުނު ވަރަށް ބޮޑު އެހީއެއް ކަން ފާހަގަކުރައްވައި ވެރިންގެ ހުންނަންވާ ސިފައަކީ އެއީ ކަން ޖަވާދު ފާހަގަކުރެއްވިއެވެ.

ޖަވާދުގެ ހާލުބައްލަވައިލެއްވުމަށް ޑރ ޝަހީމް އެތައް ފަހަރެއްގެ މަތިން އަމިއްލަފުޅަށް ގުޅުއްވައި މެސެޖު ކުރައްވާފައިވެއެވެ. އަދި އެ މެޖެސުތަކާއި ކޯލުތަކަށް ޖަވާދުއަށް ކުރިން ޖަވާބު ނުދެވިފައިވީ ނަމަވެސް ޖަވާދުއާ ވާހަކަދެއްކުމަށް ޑރ ޝަހީމް ކުރެއްވި މަސައްކަތް ޖަވާދުގެ ޕޯސްޓުގައި ފާހަގަކޮށްފައިވެއެވެ.