އުމުރާއަށް ދާން އިހްތިޔާރުކުރާ ގްރޫޕަކީ ހުއްދަ އޮތް ގްރޫޕެއްތޯ ކަށަވަރު ކުރުމަށް އިލްތިމާސްކޮށްފި
އަހުމަދު ޝުރާއު
3/29/2024, 7:25:52 PM
ޑރ ޝަހީމް
އުމުރާއަށް ދާން އިހްތިޔާރުކުރާ ގްރޫޕަކީ ހުއްދަ އޮތް ގްރޫޕެއްތޯ ކަށަވަރު ކުރުމަށް އިލްތިމާސްކޮށްފި އެވެ.
މިކަން ހާމަކުރެއްވީ އިސްލާމީ ކަންތައްތަކާއި ބެހޭ ވުޒާރާގެ ވަޒީރު ޑރ މުހައްމަދު ޝަހީމް އަލީ ސައީދު މިރޭ އެކްސްގައި ކުރެއްވި ޕޯސްޓެއްގައި އެވެ.
އެގޮތުން ޝަހީމް ވިދާޅުވީ އަމިއްލަ ޖަމާޢަތްތަކުގެ ހަވާލުގައި އުމްރާއަށް ވަޑައިގަންނަވާ ފަރާތްތަކުން އެ ވަޑައިގަންނަވާ ޖަމާޢަތްތަކަކީ އުމްރާއަށް މީހުން ގެންދިއުމުގެ ރަސްމީ ހުއްދަ އޮތް ޖަމާޢަތްތަކެއްތޯ ކަށަވަރު ކުރުމަށް އިލްތިމާސްކުރައްވާ ކަމަށެވެ.
ޝާހީމް މިފަދައިން ވިދާޅުވެފައިމިވަނީ އަމިއްލަ ޖަމާއަތެއްގެ ހަވާލުގައި އުމްރާއަށް ދިޔަ ބަޔަކު އުމްރާ ނިންމާލުމަށްފަހު އެނބުރި ރާއްޖެ އައުމަށް އުނދަގޫތަކާއި ކުރިމަތިވެފައިވާ ދަނޑިވަޅެއްގައި އެވެ. އެގޮތުން ޓިކެޓު ގަތުމަށް ދިން ޗެކްތަކެއް ބައުންސްވެ އެ އުމްރާ ގްރޫޕުގެ ވެރިންނާއި ދެކޮޅަށް ދައުވާކުރަން ރާއްޖޭގެ ޓުއާ އޮޕަރޭޓަރަކު ތައްޔާރުވެފައިވާކަމަށް ރާއްޖޭގެ ބައެއް މީޑިއާތަކުން މިއަދު ވަނީ ރިޕޯޓްކޮށްފައި އެވެ. ނަމަވެސް އެ ޖަމާއަތަކީ އިސްލާމިކް މިނިސްޓްރީގެ ހުއްދަ އޮތް ބައެއް ކަމެއް ނުވަތަ ނޫންކަމެއްވެސް އަދި މައުލޫމާތު ލިބިފައި ނުވެއެވެ.
އުމްރާއަށް ގެންދިޔުމުގެ ނަމުގައި ގިނަ ބައެއްގެ އަތުން ފައިސާ ނަގާ އަމިއްލަ ޖަމާއަތްތަކުގެ މައްސަލަތައް ދޭތެރެދޭތެރެއިން ފެންމަތިވެއެވެ. އަދި ބޮޑެތި ޖިނާއީ ތަހުގީގުތައްވެސް ކުރިޔަށް ގެންގޮސްފައި އެބަހުއްޓެވެ.