ގައްދޫ އަތުން މޮޅުވެ ތިނަދޫ އިން ފައިނަލުގެ އުންމީދު ދަމަހައްޓައިފި

ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް "ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024" ގެ ގދ. އަތޮޅުގެ އަތޮޅު ބުރުގައި 1-0 ގެ ނަތީޖާއަކުން ގައްދޫ އަތުން މޮޅުވެ ތިނަދޫ އިން މުބާރާތްގެ ފައިނަލުގެ އުންމީދު ދަމަހައްޓައިފި އެވެ.

މުބާރާތުގައި ގައްދޫ އިން ކުޅުނު ފުރަތަމަ މެޗުގައި 2-1 ގެ ނަތީޖާއަކުން ހޯނޑެެއްދޫ އަތުން ބަލިވެފައިވާ އިރު، ތިނަދޫ ގެ ފުރަތަަމަ މެޗުގައި އެންމެ ފަހުގެ އަތޮޅު ޗެންޕިއަން ވާދޫ އަތުން އެޓީމު ބަލިވީ 1-0 ގެ ނަތީޖާއަކުންނެވެ.

ހުޅުމާލޭ ރެހެންދި އެއް ނަންބަރު ފުޓްސަލް ދަނޑުގައި ކުޅެވުނު މި މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގެ ކުރީކޮޅުގައި ގައްދޫ ޓީމުން ވަރަށް ހުސް ދެ ފުރުސަތެއް ތަނަވަސްކުރި ނަމަވެސް އެޓީމަށް ލިބުނު ފުރުސަތުތަކުގެ ބޭނުން ނުކުރެވި ދިޔަ އިރު ތިނަދޫ ޓީމުން މެޗުގެ ލީޑު ހޯދީ ދެވަނަ ހާފުގެ 37 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ އިބްރާހިމް އަހުމަދު އެވެ. މިއީ އެޓީމުގެ ފާރިޝް ތަނަވަސްކޮށްދިން ފުރުސަތެއްގައި ކައިރީގައި ހުރި ކުޅުންތެރިއާ ކައިރިން ނައްޓާލުމަށް ފަހު ގައްދޫގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މީގެއިތުރުން މެޗުގެ ފަހު ވަގުތުކޮޅުގެ ތެރޭގައި ގައްދޫ ޓީމު ފަސް ފައުލް ހަމަވެގެން ވަނީ ދުރު ދެ ޕެނަލްޓީ ވެސް ލިބިފައެވެ. ނަމަވެސް ފުރަތަމަ ޕެނަލްޓީ ގައްދޫ ޓީމުގެ ކީއްޕަރު ދިފާއުކުރި އިރު ދެވަނަ ޕެނަލްޓީ އަމާޒުވީ ގޯލުގެ އަރިމަތީ ދަނޑިއަށެވެ. މީގެ އިތުރުން މެޗުގެ އިތުރު ވަގުތުގެ ތެރޭގައި ގައްދޫ ޓީމުގެ ކީޕަރު ކުރި ފައުލަކާއި ގުޅިގެން ރެފްރީ ވަނީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލައިފައެވެ.

މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ތިނަދޫ ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ތިނަދޫ ޓީމުގެ ގޯލުްކީޕަރު ހުސެއިން ފާޒިލް އެވެ. އޭނާ ވަނީ މި މެޗުގައި ގައްދޫ ޓީމުން ފޮނުވާލި ގިނަ ހަމަލާތަކެއް ހުޝިޔާރުކަމާއެކު ދިފާއުކޮށްފައެވެ.

މި ނަތީޖާއެކު ކުޅުނު ދެމެޗުން ވެސް ބަލިވެ ބާކީ އެއް މެޗު އޮއްވައި ގައްދޫ ޓީމު ވަނީ މުބާރާތުން ކަޓާފައެވެ. އަދި މިމެޗުން ލިބުނު ތިން ޕޮއިންޓާއެކު ލަނޑުގެ ތަފާތުން ތާވަލުގެ ދެވަނައިގައި މިވަގުތު އޮތީ ތިނަދޫ އެވެ. އެޓީމަށް ދެ މެޗުން ތިން ޕޮއިންޓް ލިބިފައިވާއިރު މިރޭ ވާދޫ އަތުން 6-1 ގެ ނަތީޖާއަކުން ބަލިވި ހޯނޑެެއްދޫ އަށް ވެސް ވަނީ ތިން ޕޮއިންޓް ލިބިފައެވެ.

މިއާއެކު މިގުރޫޕްގެ ދެވަނަ ޓީމުގެ ގޮތުގައި ފައިނަލުން ޖާގަ ލިބިގެންދާނީ ފަހު މެޗުގައި ހޯނޑެެއްދޫ އާއި ތިނަދޫ ވާދަކުރާ މެޗުން މޮޅުވާ ޓީމަކަށެވެ. އެމެޗު އެއްވަރުވެއްޖެނަމަ ފައިނަލުގެ ދެވަނަ ޖާގަ ލިބޭނީ ތިނަދޫ އަށެވެ.