ރައީސް ނަޝީދު ގާނާއަށް ދިރިއުޅުން ބަދަލުކުރައްވައިފި

ކުރީގެ ރައީސް މުހައްމަދު ނަޝީދު އެފްރިކާ ބައްރުގެ ގައުމެއް ކަމަށްވާ ގާނާއަށް ދިރުއުޅުން ބަދަލުކުރައްވައިފި އެވެ.

މިކަން ހާމަކުރައްވާ ރައީސް ނަޝީދު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ އަހަރުތަކެއް ވަންދެން ދެން ދިރިއުޅުއްވަމުން ގެންދަވާނީ ގާނާގައި ކަމަށެވެ.

އެގޮތުން މިއީ ކްލައިމެޓް ވަލްނެރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލްގެ މަގާމަށް އައްޔަނުކުރެެއްވުމާއި ގުޅިގެން މަގާމުގެ ޒިންމާތަކާއި ހަވާލުވެވަޑައިގެން، މަސައްކަތްތައް ފެއްޓެވުމަށްޓަކައި ނިންމެވި ނިންމެވުމެއް ކަން ރައީސް ނަޝީދު ހާމަކުރެއްވި އެވެ. ގާނާއަކީ ސީވީއެފް ހޯސްޓް ކުރާ ގައުމެވެ.

ރައީސް ނަޝީދު ކްލައިމެޓް ވަލްނެރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލްގެ މަގާމަށް އައްޔަނުކުރައްވާފައިވަނީ މިދިޔަ އަހަރުގެ ޑިސެމްބަރު މަހުގެ ތެރޭގައި އެވެ.

އެމަގާމާއި ހަވާލުވެވަޑައިގެން ރައީސް ނަޝީދު ވަނީ ރާއްޖޭެގެ ސިޔާސީ ކަންކަމާއި ދުރަށް ވަޑައިގެންނެވި ކަން ހާމަކުރައްވާފައި އެވެ. އަދި ދެން އެނބުރި ސިޔާސީ މައިދާނަށް ވަޑައިގަންނަވާނި އަހަރުތަކެއް ފަހުން ކަން ހާމަކުރައްވާފައި އެވެ.

ރައީސް ނަޝީދު ދިރިއުޅުން ގާނާއަށް ބަދަލުކުރެއްވި އިރު މީގެ ދެތިން ދުވަސްކުރިން އެމަނިކުފާނު ވަނީ ކައިވެންޏެއް ބައްލަވައިގެންފައި އެވެ.