ފަސޭހަކަމާއި އެކު އިންޑޮނޭޝިޔާ ބަލިކޮށް އޮސްޓްރޭލިއާ ކުއާޓާ ފައިނަލަށް

ގަތަރުގައި މިހާރު ކުރިއަށްދާ އޭޝިއަން ކަޕް ފުޓްބޯޅަ މުބާރާތުގެ ދެވަަނަ ބުރުގެ ފުރަތަަމަ މެޗުގައި މިއަދު ހަވީރު 4-0 ގެ ނަތީޖާއަކުން އިންޑޮނޭޝިޔާ ބަލިކޮށް އޮސްޓްރޭލިއާ އިން މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ.

އޮސްޓްރޭލިޔާ އިން މުބާރާތުގެ ދެވަނަ ބުރުން ޖާގަ ހޯދީ ގުރޫޕް ބީގެ އެއްވަނަ ޓީމުގެ ގޮތުގައެވެ. އަދި އިންޑަޮނޭޝިޔާ އިން ގުރޫޕް ޑީގެ ތިންވަނަ ހޯދިއިރު، އެޓީމަށް ދެވަނަ ބުރުގެ ފުރުސަތު ލިބުނީ ހަ ގުރޫޕުން ތިންވަނަ ހޯދި ޓީމުތަކުގެ ތެރެއިިން އެންމެ ރަނގަޅު ނަތީޖާއެއް ހޯދި ހަތަރު ޓީމުގެ ތެރޭގައި ހިމެނިގެންނެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ އޮސްޓްރޭލިޔާ އިން މެޗު ޑޮމިނޭޓުކުރި އިރު ފުރަތަމަ ހާފުގެ 12 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑަކީ އިންޑޮނޭޝިޔާގެޑިފެންޑަރު އެލްކަން ބަގެޓް އަތުން ބައިކޮޅަށް ވަން ލަނޑެކެވެ.

މިމެޗުގައި އޮސްޓްރޭލިޔާ އިން ލީޑު ފުޅާކުރި ލަނޑު ފުރަތަމަ ހާފުގެ 45 ވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް މާޓިން ބޮއިލް އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އޮސްޓްރޭލިޔާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި އޮސްޓްރޭލިޔާ އިން ވަނީ އިތުރު ދެ ލަނޑު ކާމިޔާބުކޮށްފައެވެ. އެގޮތުން އެޓީމުގެ ތިންވަނަ ލަނޑު ދެވަނަ ހާފުގެ 89 ވަނަ މިނެޓުގައި ފޯވާޑް ގުޑްވިން ކާމިޔާބުކުރި އިރު، ހަތަރުވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ޑިފެންޑަރު ހެރީ ސުއުޓާ އެވެ. މިއާއެކު މެޗުގެ ކުޅުން ނިމިގެންދިޔައީ 4-0 ގެ ނަތީޖާއަކުން އޮސްޓްރޭލިޔާ ކުރީގައި އޮވެގެންނެވެ.

މުބާރާތުގެ ކުއާޓާ ފައިނަލުގައި އޮސްޓްރޭލިޔާ ވާދަކުރަންޖެހެނީ މިމަހުގެ 30 ވަނަ ދުވަހުގެ ރޭ ދެވަނަ ބުރުގައި ސައުތު ކޮރެއާ އާއި ސައުދީ އަރަބިއާ ވާދަކުރާ މެޗުން މޮޅުވާ ޓީމަކާއި ދެކޮޅަށެވެ.