ފޮރިން މިނިސްޓަރު ޝާހިދު އެމެރިކާގެ ސެކްރެޓަރީ އޮފް ސްޓޭޓް އަށް ތައުޒިޔާގެ މެސެޖެއް ފޮނުއްވައިފި

ތޫފާން އިއާންގެ ސަބަބުން ލިބުނު ގެއްލުންތަކާ ގުޅިގެން ރާއްޖޭގެ ފޮރިން މިނިސްޓަރު އަބްދުﷲ ޝާހިދު އެމެރިކާގެ ސެކްރެޓަރީ އޮފް ސްޓޭޓް އެންތަނީ ޖޭ ބްލިންކެންއަށް ތައުޒިޔާގެ މެސެޖެއް ފޮނުއްވައިފި އެވެ.

މިނިސްޓަރު ފޮނުއްވި މެސެޖުގައި، ތޫފާން އިއާންގެ ސަބަބުން އެމެރިކާގެ އެކި ހިސާބުތަކަށް ލިބުނު ގެއްލުންތަކުގެ ޚަބަރު އެއްސެވީ ފުން ހިތާމައާއެކު ކަމުގައި ވިދާޅުވެފައިވެއެވެ.

ޤައުމީ ހިތާމައިގެ މިދަނޑިވަޅުގައި، އެމެރިކާގެ ސަރުކާރަށާއި ރައްޔިތުންނަށް، ޚާއްޞަކޮށް، މި ޙާދިޘާގައި ގެއްލުން ލިބުނު އެމެރިކާގެ ރައްޔިތުންނަށާއި، މި ޙާދިޘާގައި މަރުވި މީހުންގެ ޢާއިލާތަކަށް، ވަރަށް އިޚްލާޞްތެރިކަމާއެކު ހަމްދަރުދީ އާއި ތަޢުޒިޔާ ރައްދުކޮށްދެއްވުމަށް ވެސް މިނިސްޓަރުގެ މެސެޖުގައި އެދިވަޑައިގެންފައިވެއެވެ.

މި ދަނޑިވަޅުގައި، އިމަރޖެންސީ ރެސްޕޮންސް ޓީމުތަކުން ކުރައްވަމުން ގެންދަވާ މަސައްކަތްޕުޅުތައް ފާހަގަކުރައްވައި އެފަރާތްތަކަށް މިނިސްޓަރ ޝާހިދު ވަނީ ތައުރީފުކުރައްވާފައ އެވެ.