ގާފު ރެސިޕީގެ މިއަދުގެ ރެސިޕީއެއްގެ ގޮތުގައި މިގެނެސްދެނީ ސްޕެގެޓީ ކާބޮނާރާ އެވެ.
ބޭނުންވާ ތަކެތި:
- 200 ގުރާމު ފިޔާ (ބޮޑު، ގޮޅިކޮށް ކޮށާފައި)
- 1 ޕެކެޓު ސްޕެގެޓީ (ލޮނު ލާފައި، ތެޔޮ ފޮދެއް އަޅައިގެން ކައްކާފައި)
- 200 ގުރާމު ލީކްސް (ކައްޗަށް ކޮށާފައި)
- 200 ގުރާމު ކެޕްސިކަމް (މެދުން ފަޅާފައި، ކަރުގަނޑު ނަގާފައި، ކައްޗަށް ކޮށާފައި)
- 500 ގުރާމު ކުކުޅު ( ބޯންލެސް، ކުދިކޮށް ކޮށާފައި)
- 1 ޕަކެޓު ޗިކަން ސޮސެޖު (މެދުން ފަޅާފައި، ކައްޗަށް ކޮށާފައި)
- 3 ޖޯޑު ދިޔާ ކިރު (ޑަޗްލޭޑީ ނުވަތަ ލެކްނޯ)
- 1 ދަޅު ޗީޒު (106 ގުރާމުގެ، ގާނާފައި)
- 160 ގުރާމު ކިރިމު (ނެސްލޭ، އޮރިޖިނަލް)
- ½ ސައިސަމުސާ އަސޭމިރުސް (މުގުރާފައި)
ތައްޔާރުކުރާނެ ގޮތް:
- ތެޔޮފޮދެއްގައި ފިޔާކޮޅު މީރުކޮށްލާށެވެ.
- ކެޕްސިކަމާއި ލީކްސްކޮޅު އޭގެ ތެރެއަށް އެއްކޮށްލާށެވެ.
- ދެން އަސޭމިރުސްކޮޅާއި، ކުކުޅުކޮޅު އެއްކޮށްލާފައި، ކުކުޅު ކުޑަކޮށް ރޯފިލީމައި، ސޮސެޖުކޮޅު އެއްކޮށްލާށެވެ.
- ރަނގަޅަށް ކުކުޅު ރޯފިލީމައި، ދެ ޖޯޑު ކިރާއި، ޗީޒާއި، ކިރިމު އަޅާފައި، އެއްކޮށްފައި، ސްޕެގެޓީކޮޅު އަޅާލާށެވެ.
- ދެން ރަނގަޅަށް ހުރިހާ އެއްޗެހި އެއްކުރުމަށް ފަހު ލޮނު ހެޔޮވަރުކޮށްލާށެވެ.
- ގިނައިން ޗީޒު އަޅަން ބޭނުން ނަމަ، އަދި އިތުރަށް ޗީޒު އެޅިދާނެއެވެ. ދިޔާކުރަން ބޭނުން ނަމަ، އިތުރަށް ކިރު ވެސް އެޅިދާނެއެވެ.
