އިއްޔެ އެންމެ ބޯކޮށް ވާރޭ ވެހުނީ ހުޅުމީދޫއަށް

ރާއްޖެއަށް މިހާރު ކުރަމުން އަންނަ ހުޅަނގު މޫސުމުގެ ވިއްސާރައިގައި ވޭތުވެދިޔަ 24 ގަޑިއިރު އެންމެ ގިނައިން ވާރޭ ވެހިފައި ވަނީ އައްޑޫ ސިޓީ ހުޅުމީދޫއަށްކަމަށް މޫސުމާބެހޭ ޤައުމީ އިދާރާއިން ބުނެފިއެވެ.

މޫސުމާބެހޭ ޤައުމީ އިދާރާއިން އާއްމުކޮށްފައިވާ މައުލޫމާތުތައް ދައްކާގޮތުން އިއްޔެ ހެނދުނު 8:00 އިން މިއަދު ހެނދުނު 8:00 އަށް އައްޑޫ ސިޓީ ހުޅުމީދޫއަށް 58.9 މިލިމީޓަރަށް ވާރޭ ވަނީ ވެހިފައެވެ. ދެން އެންމެ ގިނައިން ވާރޭވެހުނު ލ.ކައްދޫއަށެވެ. އެއީ 51.4 މިލިމީޓަރުގެ ވާރޭއެވެ.

ހުޅުމީދޫ އާއި ކައްދޫއަށްފަހު ދެން އެންމެ ގިނައިން ވާރޭވެހުނުކަމަށް ރިކޯޑް ކުރެވިފައިވަނީ އދ.މަމިގިއްޔަށާއި ވ.ރަކީދޫއަށާއި ރ.އަލިފުއްޓަށާއ ރ. ދުވާފަރަށެވެ. މި ރަށްތަކަށް 40 މިލިމީޓަރަށްވުރެ ގިނައިން ވާރޭވެހިފައިވެއެވެ. މިގޮތުން އދ.މާމިގިއްޔަށް 48 މިލިމީޓަރަށް ވާރޭވެހިފައިވެއެވެ. އަދި ވ.ރަކީދޫއަށާއި ރ.އަލިފުއްޓަށް 46 މިލިމީޓަރަށް ވާރޭވެހުނުއިރު ރ.ދުވާފަރަށް ވާރޭ ވެހުނީ 42.1 މިލިމީޓަރަށްކަމަށް ރެކޯޑް ކުރެވިފައިވެއެވެ.

ވޭތުވެދިޔަ 24 ގަޑިއިރު އެންމެ މަދުން ވާރޭވެހުނުކަމަށް ރިކޯޑް ކުރެވުނީ ހދ. ކުޅުދުއްފުއްޓަށެވެ. އެރަށަށް ވާރޭ ވެހުނީ 0.2 މިލިމީޓަރަށެވެ. އަދި ގދ. ތިނަދޫއަށް ވާރޭވެހިފައިވަނީ 3.8 މިލިމީޓަރަށެވެ.

މިދުވަސްވަރަކީ މޫސުން ގޮސް ދުވަސްވަރެއްކަމުން ހުރިހާ ފަރާތްތަކުންވެސް ޚާއްސަކޮށް ކަނޑުދަތުރުކުރާ ފަރާތްތަކުން މޫސުމަށް ސަމާލުވުމަށް ކަމާބެހޭ ފަރާތްތަކުން އިލްތިމާސްކުރެއެވެ. މިގޮތުން ދަތުރަށް ފުރާއިރު މޫސުމަށް ބެލުމަށާއި މޫސުން ގޯސްނަމަ ދަތުރުތައް މަޑުޖައްސާލުމަށް ކަމާބެހޭ ފާރާތްތަކުން އިލްތިމާސްކުރެއެވެ.