ގއ އަތޮޅުގެ ދެރަށް ހިމެނޭހެން 11 ރަށެއްގައި އައު ފާމަސީ އެޅުމަށް އެސްޓީއޯއާއި ހަވާލުކޮށްފި

ގއ އަތޮޅުގެ 2 ރަށް ހިމެނޭހެން އަތޮޅު ތެރޭގެ 11 ރަށެއްގައި ފާމަސީ އަޅަން އެސްޓީއޯ ހަވާލުކޮށްފި އެވެ.

އެސްޓީއޯއާއި ހެލްތް މިނިސްޓްރީއާ ދެމެދު މިއަދު ވަނީ މިކަމާއި ގުޅޭ އެއްބަސްވުމެއްގައި މިއަދު ސޮއިކޮށްފައެވެ.

ގއ އަތޮޅުން ފާމަސީ އެޅުމަށް ނިންމާފައިވާ ދެރަށަކީ ގއ ކަނޑުހުޅުދޫއާއި ގއ ކޮލަމާފުއްޓެވެ. މީގެ އިތުރުން މ. މަޑުއްވަރީ، އދ. ދިގުރަށް، ހއ. ތުރާކުނު، މ. ރަތްމަންދޫ، ހއ. ތަކަންދޫ، ތ. އޮމަދޫ، މ. ކޮޅުފުށި، ބ.ދޮންފަނުުގެ އިތުރުން ނ. ލަންދޫގައި ވެސްނ ފާމަސީތަށް އެޅުމަށް ވަނީ ނިންމާފައެވެ.

މި 11 ރަށުގެ ހެލްތް ސެންޓަރު އިމާރާތުގެ އެތެރޭގައި ހުރި ފާމަސީތައް ނެގުމަށްފަހު އާ ފާމަސީތައް ހެލްތް ސެންޓަރު ގޯތި ތެރޭގައި ހުޅުވިގެން ދާނެ ކަމަށް ހެލްތު މިނިސްޓްރީއިން ވަނީ ބުނެފައެވެ.

ރައްޔިތުންނަށް ބޭނުންވާ ބޭސް އެންމެ ގާތުން ލިބޭނެ ގޮތް ހަމަޖައްސާފައި ވަނީ ސަރުކާރުގެ ފަރާތުން އެސްޓީއޯ މެދުވެރިކޮށެވެ. އަތޮޅު ތެރޭގެ ގާތްގަނޑަކަށް ހުރިހާ ރަށެއްގައި ފާމަސީ ގައިމްކޮށް، ހިދުމަތް ދެމުން ގެންދަނީ އެސްޓީއޯއިންނެވެ. އެސްޓީއޯއިން މިހާރު ވަނި ބައު ވެފައިވާ ފާމަސީތައް އާކުރުމުގެ މަސައްކަތް ހެލްތު މިނިސްޓްރީއާއި ގުޅިގެން ކުރަން ފަށާފައެވެ.