ރާނީގެ ޖަނާޒާގައި އެމެރިކާގެ ރައީސް ޖޯ ބައިޑަން ބައިވެރިވަޑައިގަންނަވާނެ

އިނގިރޭސި ރާނީ އެލިޒަބަތު ދޭއްގެ ޖަނާޒާގައި ބައިވެރިވެވަޑައިގަންނަވާނެ ކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.

ބައިޑަން މިކަން ހާމަކޮށްފައިވަނީ ރިޕޯޓަރަކު ކުރެއްވި ސުވާލަކަށް ޖަވާބުދެއްވަމުންނެވެ.

"އެމެރިކާގެ ނަމުގައި، އަޅުގަނޑުމެންގެ އިނގިރޭސި ރަޙްމަތްތެރިންނަށާއި، އިނގިރޭސި ސަރުކާރަށާއި، ޝާހީ ޢާއިލާއަށް ވަރަށް އިޚްލާޞްތެރިކަމާއެކު ތަޢުޒިޔާ ދަންނަވަން." ބައިޑަން ވިދާޅުވިއެވެ.

އުމުރުފުޅުން 96 އަހަރުގައި ރާނީ އަވަހަރާވެފައިވަނީ މިދިޔަ ބުރާސްފަތި ދުވަހު އެވެ.

ރާނީ އެލިޒަބަތު ރަސްކަމުގެ ތަޚުތާ ހަވާލުވެ ވަޑައިގަތީ އެކަމަނާގެ ބައްޕާފުޅު އަދި ކިންގް ޖޯޖް 1952 ވަނަ އަހަރު އަވަހާރަވުމުންނެވެ. ރާނީ އެލިޒަބަތަކީ ދުނިޔޭގައި އެންމެ ދިގު މުއްދަތަކަށް ރަސްކަން ކުރެއްވުމުގެ ޝަރަފް އޮތް ބޭފުޅާ އެވެ.

ރާނީ އެލިޒަބަތު އަވަހާރަވުމުން ރަސްކަމުގެ ތަޚުތާ އެކަމަނާގެ ދަރިކަލުން ޗާލްސް 3ވަނަ ވަނީ އިއްޔެ ރަސްމީކޮށް ހަވާލުވެވަޑައިގެންފަ އެވެ.

ރާނީގެ ޖަނާޒާ ބޭއްވުމަށް ތާވަލުކޮށްފައިވަނީ މިމަހުގެ 19ވަނަ ދުވަހުގައެވެ. ޖޯ ބައިޑަންގެ އިތުރުން އެހެން ބައެއް ގައުމުތަކުގެ ވެރިންވެސް ޖަނާޒާގައި ބައިވެރިވެވަޑައިގަންނަވާނެ ކަމަށް ރިޕޯޓްތައް ބުނެއެވެ.