އެމްއައިބީ ސެލްފް ސަރވިސް އޭޓީއެމްގެ ހިދުމަތް ތިނަދޫގައި ރަސްމީކޮށް ފަށައިފި

މޯލްޑިވްސް އިސްލާމިކް ބޭންކް (އެމްއައިބީ) އިން ގދ. ތިނަދޫގައި ސެލްފް ސާރވިސް އޭޓީއެމްގެ ހިދުމަތް ރަސްމީކޮށް ފަށައިފި އެވެ.

މިއަދު ތިނަދޫގައި ބޭއްވުނު ހާއްސަ ރަސްމިއްޔާތެއްގައި، މި އޭޓީއެމްގެ ހިދުމަތް ރަސްމީކޮށް ފައްޓަވައިދެއްވީ ތިނަދޫ ކައުންސިލްގެ ރައީސް ސައުދު ޢަލީ އާއި، ގދ އަތޮޅު ކައުންސިލްގެ ރައީސް ހަސަން ފައިހަތު ގުދުރަތުﷲ އާއި އެމްއައިބީގެ މާކެޓިންގ ހެޑް އަދި ވަގުތީގޮތުން ރީޓެއިލް ބޭންކިންގ އާ ހަވާލުވެ ހުންނެވި، ހުސެއިން އާލިމް ޝަކޫރު އެވެ.

މިއީ އެމްއައިބީ އިން ގދ. އަތޮޅުގައި ގާއިމްކުރި މިިފަދަ ފުރަތަމަ އޭޓީއެމް އެވެ.

މި އޭޓީއެމްގެ ހިދުމަތް ތައާރަފްކުރެއްވުމަށް މިއަދު ބޭއްވުނު ރަސްމިއްޔާތުގައި ވާހަކަފުޅު ދައްކަވަމުން އެމްއައިބީގެ މާކެޓިންގ ހެޑް އަދި ވަގުތީގޮތުން ރީޓެއިލް ބޭންކިންގ އާ ހަވާލުވެ ހުންނެވި، ހުސެއިން އާލިމް ޝަކޫރު ވިދާޅުވީ، މި އޭޓީއެމްގެ ހިދުމަތާއެކު އަތޮޅުގެ ރައްޔިތުންނަށް ބޮޑެތި ލުއިފަސޭހަތަކެއް އެ ބޭންކުގެ ކަސްޓަމަރުންނަށް ލިބިގެން ދާނެ ކަމަށެވެ. ވަކިން ހާއްސަކޮށް ފައިސާ ޖަމާކުރުމުގެ ހިދުމަތާއެކު މަސްވެރިންނަށްވެސް ބޮޑެތި ލުއިފަސޭހަތަކެއް ލިބިގެންދާނެކަމަށް އާލިމް ފާހަގަކުރެއްވި އެވެ.

"މި މެޝިނުގެ އެންމެ ބޮޑު ފައިދާއެއްވާނެ ކަމަށް އަޅުގަނޑު ހިތުގަ އޮތީ އަތޮޅުތެރޭގެ މަސްވެރިންނަށް. ކޮންމެ ގަޑިއެއްގަ އައިކަމަށްވިޔަސް ބޭނުންވާ ޓްރާންސެކްޝަން އަދި ފައިސާ ޖަމާކުރުމުގެ ހިދުމަތް ފަސޭހައިން ލިބިގެންދާނެ" ހުސެއިން އާލިމް އަބްދުއްޝަކޫރު

ތިނަދޫ ފެރީޓާމިނަލް ސަރަހައްދުގައި ގާއިމްކުރެވުނު މި އޭޓީއެމް ހިދުމަތް ތައާރަފްކުރުމަށް ބޭއްވުނު ރަސްމިއްޔާތުގައި އެމްއައިބީގެ އިސްވެރިންނާއި، އެ ބޭންކުގެ ތިނަދޫ ސްޓާފުންނާއި، މުވައްސަސާތަކުގެ އިސްވެރިން ބައިވެރިވެވަޑައިގެންނެވި އެވެ.