އިމާރާތް ކުރުމުގެ ދާއިރާއަށް ވަނުމަކީ ސަރުކާރުގެ ސިޔާސަތެއް ނޫން: މިނިސްޓަރ އަސްލަމް

ސަރުކާރުން ހިއްސާވާ ކުންފުނިތަކުން އިމާރާތްކުރުމުގެ ދާއިރާއަށް ވަނުމަކީ ސަރުކާރުގެ ސިޔާސަތެއް ނޫން ކަމަށް ހައުސިން މިނިސްޓަރ މުހައްމަދު އަސްލަމް ވިދާޅުވެއްޖެއެވެ.

މިނިސްޓަރު އަސްލަމް މިހެން ވިދާޅުވީ އެ މިނިސްޓްރީން ކުރިއަށްގެންދާ ދެ މަޝްރޫޢަކާ ގުޅޭގޮތުން ސުވާލުކުރުމަށް މިނިސްޓަރ މިއަދު މަޖިލީހަށް ހާޒިރުކޮށް، މެމްބަރުން ކުރެއްވި ސުވާލުތަކަށް ޖަވާބު އަަރުވަމުންނެވެ.

މިނިސްޓަރ އަސްލަމް ވިދާޅުވީ، ސަރުކާރުގެ ކުންފުނިތައް އުފައްދާފައި ހުރި މަގުސަދު ނޫން އެހެން ކަންކަމުގެ ތެރެއަށް އެ ކުންފުނިތައް ވަނުމަކީ އެ މިނިސްޓްރީން ގަބޫލުކުރާ ސިޔާސަތެއް ނޫން ކަމަށާއި، ސަރުކާރު ހިއްސާވާ ބައެއް ކުންފުނިތަކުން ކޮންޓްރެކްޓަރުންގެ ގޮތުގައި ރަޖިސްޓްރީވާން ހުށަހަޅާފައިވާ ކަމަށެވެ.

އަދި ގާނޫނީ ގޮތުން އެކަމަކީ މަނާކަމަކަށް ނުވިނަމަވެސް އެކަންތައްތަކުގެ ތެރެއަށް އެކުންފުނިތައް ވަނުން ގަބޫލު ނުކުރެވޭނެ ކަމަށް މިނިސްޓަރ ވިދާޅުވިއެވެ.