ކޮންމެ ރަށެއްގައި ތާރުއަޅާކަށް ނުޖެހޭ: އަސްލަމް

ރާއްޖޭގެ ކޮންމެ ރަށެއްގެ މަގުތަކުގައި ތާރުއެޅުމަކީ ކުރަން ޖެހޭ ކަމެއް ނޫންކަމަށާއި، މަގު ހެދުމުގެ އިތުރުގޮތްގޮތްވެސް ހުރިކަމަށް ޕްލޭނިންގ މިނިސްޓަރ މުޙައްމަދު އަސްލަމް ވިދާޅުވެއްޖެ އެވެ.

މިނިސްޓަރ އަސްލަމް މިހެން ވިދާޅުވީ، މިއަދު އޮތް ރައްޔިތުންގެ މަޖިލީހުހުގެ ޖަލްސާގައި ބައެއް މެމްބަރުން ކުރެއްވި ސުވާލުތަކަށް ޖަވާބުދެއްވަމުންނެވެ. މިނިސްޓަރ އަަސްލަމް މަޖިލީހަށް ހާޒިރުކޮށްފައިވަނީ ވިލިނގިލީ ދާއިރާގެ މެމްބަރު ސައުދު ހުސައިން، ކޮލަމާފުށި މަގުތައް ހެދުމުގެ މަޝްރޫއު ކުރިއަށް ނުދާ ކަމަށް 2021ވަނަ އަހަރު ކުރެއްވި ސުވާލަކަށް ޖަވާބު ދެއްވުމަށެވެ.

ސައުދު ކުރެއްވި ސުވާލަށް ޖަވާބުދެއްވުމަށްފަހު، މިނިސްޓަރ ވިދާޅުވީ، އުމްރާނީ ތަރައްގީގެ ތެރެއިން، މަގުތަކުގައި ތާރު އެޅުމަކީ މިހާރު އެންމެ ބޮޑަށް ޑިމާންޑުކުރާ އެއްކަން ކަމުގައެވެ. އެހެން ނަމަވެސް ކޮންމެ ރަށެއްގައި ތާރުއެޅުމަކީ ކުރަންޖެހޭކަމެއް ނޫންކަމުގައި މިނިސްޓަރ ވިދާޅުވި އެވެ. އެގޮތުން ތާރު އެޅުމަށް ޑިމާންޑް ކުރާ ބައެއް ރަށްރަށަކީ ވަރަށް ކުދިރަށްތައް ކަމުގައި މިނިސްޓަރ ފާހަގަކުރެއްވި އެވެ.

"ކޮންމެ ރަށަކީ އަޅުގަނޑު ގަބޫލެއް ނުކުރަން ތާރުއަޅަން ޖެހޭނެ ރަށެއްކަމަށް. ބައެއް އާބާދީ ތޮއްޖެހިފައިވާ ހުންނަ ޓްރެފިކް ހައި ތަންތަނުގައި ތާރުއަޅައިގެން މަގުތައް ހަދަން ޖެހިދާނެ. އެއްކޮޅުގައި ހުރެފައި އަނެއް ކޮޅުގައި ހުންނަ މީހަކަށް ގޮވާލީމަ އަޑުއިވޭ ހިސާބުގައި އޮންނަ ރަށްރަށުގައި ވެސް ތާރު އެޅުމަށް ޑިމާންޑް އެބަހުރި. އަޅުގަނޑު ގަބޫލެއް ނުކުރަން އެއީ ކޮންމެހެން ވެހިކަލްގައި ދަތުރު ކުރަން ޖެހޭ ރަށްރަށް ކަމުގައި. އެރަށްރަށުގައި ތާރު އަޅަން ޖެހޭ ކަމަކަށް އަޅުގަނޑު ގަބޫލެއް ނުކުރަން." އަސްލަމް ވިދާޅުވި އެވެ.

ސަރުކާރުން އަންނަނީ މިހާރުވެސް ގިނަ ރަށްރަށެއްގެ މަގުތައް ޒަމާނީ ފެންވަރަށް ތަރައްޤީކުރަމުންނެވެ. މިނިސްޓަރ އަސްލަމް ވިދާޅުވީ، 22 ރަށެއްގެ މަގުތައް ޒަމާނީ ފެންވަރަށް ހެދުމަށް ކޮންޓްރެކްޓް ކުރެވިފައިވާއިރު 19 ރަށެއްގެ މަގުތައް ޒަމާނީ ފެންވަރަށް ހެދުމަށް މިހާރު ޕްލޭނެ ކުރެވިފައިވާކަމަށެވެ.