ވާހަކަ: އެހަނދާން ފޮހެވޭތޯ ބެލިޔަސް

އެޑިޓަރުގެ ނޯޓު: މި ވާހަކަ އަކީ ގާފު ކުރުވާހަކަ މުބާރާތަށް ފާތިމަތު އުލްފާ އަބްދުﷲ ހުށައަޅާފައިވާ ވާހަކަ އެކެވެ. މިވާހަކަ ގާފު އޮންލައިންގައި ޝާއިއުކޮށްފައި މިވަނީ ވާހަކައަށް މާކްސް ދިނުމަށްފަހު، މި މުބާރާތުގެ ޤަވާއިދުގައިވާ ގޮތުގެ މަތިން ވާހަކަ އަށް ލިބޭ ވިއުސް އަށްވެސް މާކްސް ދިނުމަށް ހަމަޖެހިފައިވާތީ ކިއުންތެރިންގެ ޚިޔާލު ހޯދުމަށެވެ. ވާހަކައަށް މާކްސް ދިނުމުގައި ބަލާނީ ވާހަކަ ޝާއިއުކުރާ ތާރީޚުން ފެށިގެން 10 ދުވަހުގެ މުއްދަތުގައި އެ ވާހަކައަކަށް ލިބޭ ވިއުސްގެ މައްޗަށެވެ.

ހެނދުނުއްސުރެން ބޯވަމުން ޖަމާވަމުން އައި ވިލާތަކުން މުޅި އުދަރެސް ވަނީ ބަނަވެފައެވެ. ވަށައިގެން ފެންނަން އޮތީ އަނދިރިކަމާއި ފަޅުކަމެވެ. ގޯތިތެރޭގައި ޖެހެމުންދިޔަ ވައިރޯޅި ވެސް އާދަޔާ ޚިލާފަށް ބާރުވާން ފަށައިފިއެވެ. ހީވީ ހަމަ ދެންމެ ތުފާނެއް އެރިހެނެވެ. ހިތާމައިގެ ބޯވާރޭ ވިލާތައް ފެންފޮތިން ފެން ފެލާލިހެން މުޅި ކޯތާފަތް ތެންމަމުން ދިޔަ ޒޫނާ އޭނާގެ މަންމައާއި އެކުގައި ނަގާފައިވާ ތަސްވީރުތަކަށް ބަލައިގެން ހުންނަތާ އެތައް ގަޑިއިރެއް ވެއްޖެއެވެ. ގަޑީގެ ކަށި ނުވަތަށް އެނބުރޭނެ ނަމައޭ އޭނާގެ ހިތަށް އެރިއެވެ. ނަމަވެސް މާޒީގައި މަންމައާއެކު ހޭދަކުރެވުނު އުފާވެރި ދުވަސްތައް އަނބުރާ ގެންނާނީ ކިހިނެއް ހެއްޔެވެ؟ ހެދޭކުރިއަށް ފެންދޭ އުސޫލުން ތިމާ ބަލައި ބޮޑުކުރި މަންމަގެ އަޅާލުން ހޯދާނީ ކިހިނެއްހެއްޔެވެ؟ ތިމާގެ އަތުން ބީވެގެންދިޔަ ކުށެއް ނެތް މަންމަގެ ލޯބި އަނބުރާ ހޯދާނީ ކިހިނެއް ހެއްޔެވެ؟ ވަހުމުގެ ކަޅު ވިލާތައް ސިކުނޑީގައި ދައުރު ކުރަމުންދިޔަ ޒޫނާއަށް އޭނާގެ އަމިއްލަ ނަފްސާއި ސުވާލުކުރެވުނެވެ.

އެއީ މީގެ ދެ އަހަރު ކުރިއެވެ. އަހަރަކީ ޒޫނާ ގްރޭޑް9 ފުރިހަމަކުރުމަށްފަހު ގްރޭޑް 10 އަކަށްދާ އަހަރުކަމަށްވުމުން ކިޔެވުމުގައި އާ ހަރުފަތްތައް ކަޑައްތުކުރުމަށްޓަކައި ޒޫނާ އޭނާގެ މަންމައާއެކު މާލެ ބަދަލުވިއެވެ. މުސްތަޤުބަލުގައި އޭނާގެ މަންމަ އެދޭފަދަ ޙުލްޤުހެޔޮ، މޮޅު މީހަކަށް ވުމުގެ އުންމީދުގައެވެ. ކޮންމެ ދުވަހަކުމެ އޭނާގެ މަންމަ ކުރާ އުންމީދުތަކާއި ދެކޭ ހުވަފެންތައް ހަޤީޤަތަކަށް ހެދުމުގެ މާތް މަޤްސަދުގައެވެ. އެގޮތުން ޒޫނާގެ އުމުރުން އެންމެ 5 އަހަރުގައި އޭނާގެ ބައްޕަ މިފަނާވަނިވި ދުނިޔެއާ އަލްވަދާޢުކިޔައި ކީރިތިﷲގެ ޙަޒްރަތަށް ދަތުރުކުރި ކަމުގައި ވީނަމަވެސް ޒޫނާގެ މަންމަ، އެނާއަށް ލިބިފައިވާ ހަމައެކަނި ދަރިފުޅަށް ވެވޭ ޤުރުބާނީތަކާއި، ކުރާ އުންމީދުތަކަށް ކުޑަ ނަމަވެސް ހީނަރުކަމެއް ނާދެއެވެ. ކުރާ ވަޢުދުތައް ދުވަހަކުވެސް އަދާނުކޮށް ނުދާ އެންމެ ފަހަރެއްވެސް ނާދެއެވެ.

އަވިގަދަ ދުވަހެއްގެ މެންދުރު ވަގުތެކެވެ. ބޭރަށް ލޯ ދިލުވާލާކަށްވެސް ނުކެރެއެވެ. ރަތް ދަކަ އަވީގެ ހޫނުގެ ސަބަބުން ލޮލަށްވާ އުނދަގުލުންނެވެ. ދުވަހަކީ ބޮޑު ޗުއްޓީއެއް ނިންމާލުމަށްފަހު އާ އަހަރުގެ ކިޔެވުން އަޙްމަދިއްޔާ ސުކޫލުގައި ފެށެން އޮތް ދުވަހެވެ. ގޮޅިޖެހި ޔުނީފޯރމާއި، އަޅިކުލައިގެ ބުރުގާ މެކުހުގައި އިސްތިރި ކުރުމަށްފަހު 12:30ގައި ޒޫނާ ސުކޫލަށް ދިޔައެވެ. މިއަދަކީ އެ ސުކޫލަށްދާ ފުރަތަމަ ދުވަހަށްވުމުން ޒޫނާގެ މޫނު މައްޗަށް ވެރިވެފައިވަނީ ހިނިތުންވުމާއި އުފާވެރިކަމެވެ. އެނާގެ ހިތަށް ލިބިގެންދިޔަ އުފާވެރިކަމާއި، ވެރިވި ތަސައްލީގެ ބޮޑުކަމުން އުދުއްސައިގެން ގޮސް އުޑުގައިވާ ހާވިލާތައް ހާވާލަފާނޭ ބުންޏަސް ދޮގަކަށްނުވާނެއެވެ.

މަޑު ރީނދޫ ކުލައިން ޒީނަތްތެރި ކޮށްފައިވާ ކުލާހުގެ ތެރެއަށް އޭނާ ވަނެވެ. އޭސީ ކޮށްފައިވާ ކުލާސް ތެރޭގައި ވަނީ ލެމަނައިޑުގެ މަޑުމަޑު މީރުވަހެވެ. ކުލާސްތެރޭގައި އަތުރާލެވިފައިވާ ފޮތް ހަރުގަނޑުތަކުންނާއި ގޮނޑިތަކުންވެސް ފެންނަނީ ސާފުތާހިރުކަމެވެ. ތަރުތީބުކަމާއި ތަނަވަސްކަމެވެ. އެކުލާހުގައި ތިބި ގިނަ ކުދިންނަށް ޒޫނާއަކީ އާ ކުއްޖެއްކަމަށްވުމުން އޭނައާ ވާހަކަދައްކަން ޖެހިލުންވިއެވެ. ނަމަވެސް އެކުލާހުގައި ބައިގަނޑު ހަދާލާފައި ތިބި އަންހެން ކުދިބަޔަކު ޒޫނާއާ ބައްދަލުކޮށް ގާތް ރަހުމަތްތެރިކަމުގެ ގުޅުން ބާއްވަން އެދުމުން އެކަމާ ދެކޮޅުނަހަދައި އޭނާ އެއްބަސްވިއެވެ.

ދުވަސްތައް މާޒީއާ އެކުވަމުންދިޔައެވެ. ޒޫނާގެ އަޤީދާ ބަލިކަށިވާން ފަށައިފިއެވެ. އަޚްލާޤީ ގޮތުންނާއި، ކިޔެވުމުގެ ރޮނގުންނެވެ. ފިލާވަޅުތައް ދުވަހުން ދުވަހަށް ނިންމުމުގައި ފަރުވާކުޑަކުރަން ފެށިއެވެ. އިމްތިހާން ބޯމަތިވުމުން ތައްޔާރުވާން އަވަސްވެގަންނަނީ އަސްކަނިމަތިން ހަނދާންވެ ވާރޭވެހެން ފެށީމައެވެ. ގިނަވަގުތު ހޭދަކުރަނީ ޒޫނާގެ ރަށްޓެހިންނާއެކު މަޖާކުރުމުގައެވެ. ރެވިތެޔޮ ވަށައިގެން އުޅޭ ބީދައިންނެވެ.

މިކަންތައްވެގެން ދިޔައީ އޭނާގެ މަންމަ ހިތްދަތިވެ، ގަބޫލުކުރަން ދަތިވިކަމަކަށެވެ. އަހިވަކާ ޖެހި އަހިވަށް ފާވާނެކަމާއި، ރުހުމުގެ ލޮލަކަށް އައިބެއް ނުފެންނާނޭ ބުނެ ވިސްނަދޭން މަސައްކަތްކުރިއެވެ. ހިންމަތާއެކުގައެވެ. ނަމަވެސް ޒޫނާއަށް އޭނާގެ މަންމަ ކީހާ ޅެންވީ ފަރިއްސަކަށެވެ. ކަންމިހެންވުމުން ހިތި ކަނދޫ ވެލެއްގެ ބުޑަށް ފެންކަމުގައި މާމުއި އެޅިޔަސް އޭގައި އަޅާއެއްޗެއް ފޮންޏެއް ނުވާނެކަން އޭނާގެ މަންމައަށް ވިސްނުނެވެ.

އޭގެ އެއް އަހަރުފަހެވެ. މުޅިދުނިޔެވަނީ ޢާލަމީ ބަލިމަޑުކަމެއްގެ ބިރުވެރިކަމުގެ އަނދަވަޅެއްގައެވެ. ކޮވިޑް-19 ގެ ބިރުވެރިކަމެވެ. މި ބަލިމަޑުކަމުގެ ހާއްޔަކަށް ރާއްޖެވެފައި އޮތްއިރު، ކަމާބެހޭ ފަރާތްތަކުން ދެއްވާ އިރުޝާދުތަކައް ތަބާނުވެ، ޕާޓީތަކާއި، މިނޫންވެސް އެކި އެއްވުންތަކުގައި ބައިވެރިވުމުގެ ނަތީޖާއަކަށްވީ ޒޫނާ ބައިވެރިވި ޕާޓީއެއްގައި އުޅުނު އޭނާގެ ގާތް ރަޙުމަތްތެރިއަކު މިބައްޔަށް ފައްސިވުމެވެ. ކަންމިހެންވުމާއެކު، އެ ޕާޓީގައި ބައިވެރިވި މީހުންގެ އިތުރުން ޒޫނާގެ މަންމަވެސް މި ބަލި ހުރިތޯ ޓެސްޓުކޮށް ނަތީޖާ ލިބުނުއިރު ޓެސްޓުހެދި ހުރިހާ މީހުން މިބައްޔަށް ފައްސިވިއެވެ. މިކަންވެގެން ދިޔައީ ޒޫނާއަށް ލިބުނު ވަރަށް ބޮޑު ހިތާމައަކަށެވެ. އެއީ ހަމައެކަނި އޭނާ މި ވައިރަހަށް ފައްސިވުމުން އެކަންޏެއް ނޫނެވެ. އޭނާގެ މަންމައަކީ ފުއްޕާމޭގެ ކެންސަރުބަލީގެ ފަރުވާ ހޯދަމުންއަންނަ މީހަކަށްވެފައި، އަދި ދިގުމުއްދަތަކަށް ބޭސްފަރުވާ ކުރަންޖެހޭ މީހުންނަކީ މި ވައިރަހުގެ ނުރައްކާ ބޮޑު ބަޔަކަށް ވުމުންނެވެ.

އޭގެ ތިން ދުވަސްފަހެވެ. ޒޫނާގެ މަންމަގެ ފުއްޕާމޭގައި ނިއުމޯނިއާގެ އަސަރު ބޮޑުވެ، އެތަކެއް ވޭނާއި ކެކުޅުމެއް ބަރުދާސްތުކުރަމުން ދަނިކޮށް މިދުނިޔެއާ އަލްވަދާޢުކިއެވެ. އެދުވަސް ވެގެންދިޔައީ އޭނާގެ އުފާވެރި ދުނިޔެ ގިޔާމަތް ވީ ދުވަހަކަށެވެ. މަންމަ މި ދުނިޔެއާ ވަކިވި ޚަބަރު ޒޫނާއަށް ލިބުމާއެކު ހީވީ ބިންގަނޑު ފައިދަށުން ދެމިހެނެވެ. ވަޅުފެހި ކޮޅެއްހެން ފިނިވެފައިވާ ޒޫނާގެ މުޅި ހަށިގަނޑު ތުރުތުރު އަޅަމުން ދިޔައީ ތެޅެމުންދާ ރޯ މަހެއްހެނެވެ. މާޔޫސްވެފައިވާ ޒޫނާއަށް އޭނާ ކުރެވުނު ކުށްތައް މިވިސްނުނީ ވަގުތު ފާއިތުވިފަހުންނެވެ. ފަރުދީ ޒިންމާ ނުނެގުމާއި މަންމަ ބުނި ބަސްތައް ގަބޫލުނުކުރުމުންނެވެ. މިހާރު ޒޫނާ ވަނީ އޭނާގެ އުންމީދުތަކާއި ދެކެމުންދިޔަ ހުވަފެންތައް ހަގީގަތަކަށް ހެދުމުގައި، ގިނަގުނަ ހުރަސްތައް ގިރާކުރަން ޖެހިފައެވެ. މަންމައާއެކު ހޭދަކުރެވުނު ދުވަސްތައް އާވުމުން ކަރުނައަޅަމުން ދިޔަ ޒޫނާ އެ މާޒީގެ ހަނދާންތައް ފޮހެވޭތޯ މަސައްކަތްކުރިއެވެ.

- ނިމުނީ -