ޖޭޕީއާއި ޕީޕީއެމަށް ފައިސާ ދޭން ފިނޭންސަށް ފޮނުވައިފި

ޕީޕީއެމާއި ޖުމްހޫރީ ޕާޓީއަށް ފައިސާ ދޫކުރަން އިލެކްޝަންސް ކޮމިޝަނުން ފިނޭންސް މިނިސްޓްރީއަށް ފޮނުވައިފި އެވެ.

އިލެކްޝަންސް ކޮމިޝަނުން ބުނީ އެ ދެ ޕާޓީއަށް ފައިސާ ދޫކުރަން ފޮނުވީ، ގަވާއިދާ އެއްގޮތަށް ރިޕޯޓުތައް ހުށަހަޅާފައިވާތީ ކަމަށެވެ.

އެ ކޮމިޝަންގެ ނައިބު ރައިސް އިސްމާއިލް ހަބީބު ވިދާޅުވީ 10،000 މެމްބަރުންނަށް ވުރެ ގިނައިން ތިބި ހަތަރު ޕާޓީގެ ތެރެއިން، އޮޑިޓް ރިޕޯޓާއި އަހަރީ ރިޕޯޓު ހުށަހަޅާފައި ވަނީ ޕީޕީއެމާއި ޖުމްހޫރީ ޕާޓީން ކަމަށެވެ. އެ ދެ ޕާޓީއަށް ފައިސާ ދޫކުރަން ފޮނުވީ މިދިޔަ ހަފްތާގައެވެ.

ހަބީބު ވިދާޅުވީ މި މަސް ނިމުމުގެ ކުރިން އެމްޑީޕީ އާއި އަދާލަތު ޕާޓީގެ ރިޕޯޓުތައް ހުށަހެޅުމުން އެ ޕާޓީތަކަށް ފައިސާ ދޫކުރުމުގެ ކަންކަން ފަށާނެ ކަމަށެވެ.

ޕާޓީތަކަށް ދޫކުރާ ފައިސާގެ އަދަދު

އެމްޑީޕީ: 15 މިލިއަން ރުފިޔާ

ޕީޕީއެމް: 9.4 މިލިއަން ރުފިޔާ

ޖޭޕީ: 5.5 މިލިއަން ރުފިޔާ

އަދާލަތު: 2.9 މިލިއަން ރުފިޔާ

ގާނޫނުގައި އޮންނަނީ ކޮންމެ އަހަރަކު ވެސް ދައުލަތުގެ ބަޖެޓުން 0.1 ޕަސެންޓް ސިޔާސީ ޕާޓީތަކަށް ދޫކުރުމަށެވެ. މި ފައިސާ ދޫކުރަން ޖެހެނީ 10,000 މެމްބަރުން ހަމަވާ ޕާޓީތަކަށެވެ. ރާއްޖޭގައި 11 ސިޔާސީ ޕާޓީއެއް ރަޖިސްޓްރީކޮށްފައި އޮތަސް މި އަދަދަށް މެމްބަރުން ހަމަވެފައިވަނީ ހަތަރު ޕާޓީއެކެވެ.

މި އަހަރަށް ފާސްކުރި ބަޖެޓުގައި ސިޔާސީ ޕާޓީތަކަށް 32.8 މިލިއަން ރުފިޔާ ކަނޑައަޅާފައިވެ އެވެ. މި ފައިސާ އަންނަ އެޕްރީލް 31 ގެ ކުރިން ދޫކުރަން ޖެހެ އެވެ.