އެމްއައިބީގެ އުޖާލާ ފައިނޭންސިންގެ ދަށުން މަސްވެރިންނަށް ލޯނު ދޭން ފަށައިފި

މޯލްޑިވެސް އިސްލާމިކް ބޭންކުން އެ ބޭންކުގެ އެންމެ މަގްބޫލް ފައިނޭންސިން ސްކީމް އުޖާލާ ދިރިއުޅުން ފައިނޭންސިން ސްކީމުގައި މަސްވެރިން ބައިވެރި ކުރަން ފަށައިފިއެވެ.

މިއީ ރާއްޖޭގެ ބޭންކަކުން މަސްވެރިންނަށް ލޯނު ފެސިލިޓީއެއް ދޭން ނިންމި ފުރަތަމަ ފަހަރެވެ. އެ ކަން އިއުލާންކޮށްފައިވަނީ އިސްލާމިކް ބޭންކުން މިރޭ ފަރެސްމާތޮޑާގައި ބޭއްވި ރަސްމިއްޔާތެއްގައި އެބޭންކުގެ އެކްޓިން ސީއީއޯ އަހްމަދު ރިޟާއެވެ.

މި ރަސްމިއްޔާތުގައި ވާހަކަ ދައްކަވަމުން ރިޟާ ވިދާޅުވީ އެ ފުރުސަތުގެ ބޭނުން ހިފައިގެން، ދިރިއުޅުމުގައި އާއި އަދިވެސް އެހެނިހެން ކަންކަމުގައި ކުރަން ގަސްތުކޮށްފައިވާ ކަންކަން ކުރުމަށް މަސްވެރިންނަށް މަގުފަހިވެގެން ދާނެ ކަމަށެވެ.

އެމްއައިބީގެ އުޖާލާ ދިރިއުޅުން ފެސިލިޓީއަކީ މިވަގުތު ރާއްޖޭގެ ގިނަބަޔަކު ބޭނުނުކުރާ އެންމެ މަގުބޫލު އެއް ފައިނޭންސިން ފެސިލިޓީއެވެ. އެއްވެސް ރަހުނަކާ ނުލައި ގިނަވެގެން 400،000ރ ގެ މުދާގަނެވޭ މިސްކީމަކީ އިސްލާމީ ޝަރިއާ ހުއްދަކުރާ އުސޫލުތަކުގެ ތެރެއިން ކުރިޔަށްގެންދެވޭ ސްކީމެކެވެ.

މިރޭ މި އިއުލާނު ކުރެވުނު “އުޖާލާ މަސްވެެރިޔާ” ޕައިލަޓް ސްކީމްގެ ދަށުން މަސްވެރިންނަށް ލިބޭ އާމްދަނީއަށް ބަލާ -/100،000 ރުފިޔާ ހަމައަށް މުދާ ނެގުމުގެ ފުރުސަތު ލިބިގެންދާނެ ކަމަށް އެމްއައިބީއިން މައުލޫމާތު ދެއެވެ. އެގޮތުން ފަރުނީޗަރު، ސައިކަލް، ޓީވީ، ބަދިގެ ސާމާނު، އައިސް އަލަމާރި، ދޮންން މެޝިން ފަދަ ސާމާނު މިސްކީމުން ގަނެވޭނެއެވެ.