މަސްކިރުވިތާ 48 ގަޑިއިރުން މަސްވެރިންނަށް ފައިސާ ޖަމާކޮށްފި , މިއަދު އެކަނިވެސް 2 މިލިއަން ރުފިޔާ ޖަމާކުރި!

ރައީސް ޑރ މުހައްމަދު މުއިއްޒުގެ ރިޔާސީ ވައުދުފުޅާ އެއްގޮތަށް މަސްކިރާތާ 48 ގަޑިއިރުގެ ތެރޭގައި މަސްވެރިންނަށް ފައިސާ ޖަމާކުރަން ފަށައިފި އެވެ.

މަސްކިރާތާ 48 ގަޑިއިރުތެރޭ މަސްވެެރިންގެ ފައިސާ ޖަމާކުރަން ނިންމައި މިއަދުން ފެށިގެން އެއުސޫލަށް އަމަލުކުރާނެކަން ރައީސް ޑރ މުހައްމަދު މުއިއްޒު އިއުލާނުކުރެއްވީ އިއްޔެ އެވެ.

މިއާއި އެކު މިއަދު ފިޝަރީޒް މިނިސްޓަރު އަހުމަދު ޝިޔާމް އެކްސްގައި ކުރެއްވި ޕޯސްޓެއްގައި ވިދާޅުވީ ޑިސެމްބަރ 8 ވަނަ ދުވަހު މަސްވެެރިން މިފްކޯއަށް ކިރި މަހަށްވާ 2،045،823.37ރ މިއަދު މިފްކޯއިން މަސްވެރިންނަށް ޖަމާކޮށްފައިވާ ކަމަށެވެ. އަދި މިއީ އިއްޔެ މަސްވެރިންގެ ޕޭމަންޓުގެ ބެކްލޮގު ސާފުކުރިއިރު ޑިސެމްބަރު 7 ވަނަ ދުވަހު ބޭނިމަހުގެ ޕޭމަންޓު ހިމެނޭގޮތަށް ދެއްކި ޕޭމަންޓުގެ ފަހުން ފުރަތަމަ ފަހަރަށް 48 ގަޑިއިރުތެރޭ މަސްވެެރިންގެ ފައިސާ ރައީސުލް ޖުމްހޫރިއްޔާގެ ވަޢުދުފުޅާ އެއްގޮތަށް ޖަމާކުރެވުނު ތާރީޚީ ދުވަސް ކަމަށް ޝިޔާމް ވިދާޅުވިއެވެ. މިއަދު ފާހަގަކުރަމުންދާ 44 ވަނަ މަސްވެރިންގެ ދުވަހާއި ގުޅިގެން ސޯޝަލްމީޑިއާ އެކްސްގައި ޝިޔާމް ކުރެއްވި ޕޯސްޓެއްގައި ވިދާޅުވީ މަސްވެރިންގެ އަދި މަސްވެރި ސިނާޢަތުގައިހުރި ޒަމާންވީ ބޮޑެތި ގޮންޖެހުންތަކަށް ރައީސުލްޖުމްހޫރިއްޔާ ގެންދަވަނީ ޖުމްލަ ހައްލުތަކެއް ހޯއްދަވައި ދެއްވަމުން ކަމަށެވެ.

މަސްވެރިން ކިރުވާ މަހަށް 48 ގަޑިއިރު ތެރޭގައި ފައިސާ ދިނުމަކީ ރައީސް މުޢިއްޒުގެ ރިޔާސީ ވަޢުދުފުޅެކެވެ. ނަމަވެސް ވެރިކަމާއި ހަވާލުވިއިރު މަސްވެރިންނަށް ނުދީ ހުރި ފައިސާގެ ބޮޑު ބެކްލޮގެއް ހުރުމުން އެފައިސާ ހަލާސްކުރުމަށް ސަރުކާރުން ވަނީ ފާއިތުވި އެއް އަހަރު ދުވަހުގެ ތެރޭގައި ބޮޑެތި މަސައްކަތްތަކެއް ކޮށްފައެވެ.