ގައްދޫ މަގުތަކުގައި ތާރުއެޅުމަށް ބޭނުންވާ ސާމާނު އެރަށަށް ގެންގޮސްފި

ގދ. ގައްދޫ މަގުތަކުގައި ތާރު އެޅުމަށް ބޭނުންވާ މެޝިނާއި ވެހިކަލްތައް އެރަށަށް ގެންގޮސްފި އެވެ.

ގައްދޫގެ މަގުތައް ޒަމާނީ ފެންވަރަކަށް ހެދުމުގަ މަސައްކަތް ކުރަމުން އަންނަ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން މިއަދު ބުނީ ގައްދޫ މަގުތަކުގައި ތާރު އެޅުމަށް ބޭނުންވާ މެޝިނަރީތަކާއި ވެހިކަލްތައް ރޭގެވަގުތެއްގައި އެރަށަށް ގެންގޮސްފައިވާ ކަމަށެވެ. އަދި ގައްދޫގައި މިހާރު ކުރިއަށްދަނީ މަސައްކަތް ކުރާ ސައިޓް ސާފުކުރުމާއި ތާރައިގެ މަސައްކަތް ކުރާ މީހުން މޮބިލައިޒް ކުރުމުގެ މަސައްކަތް ކަމަށްވެސް އާރުޑީސީން ބުނެއެވެ.

މި މަޝްރޫއުގައި ގައްދޫގެ ރިންގްރޯޑް ހިމެނޭގޮތަށް 6 މަގެއް ޒަމާނީ ފެންވަރަށް ތާރު އަޅައިގެން ހެދުމަށް ވަނީ ހަމަޖެހިފައެވެ. އެގޮތުން ގދ.ގައްދޫގައި ހެދުމަށްހަމަޖެހިފައިވަނީ 6 ކިލޯމީޓަރުގެ މަގެވެ.މި މަޝްރޫއުގެ މަސައްކަތް 510 ދުވަހުގެ ތެރޭ ނިންމަން ހަވާލުކުރެވިފައި ވާއިރު، މި މަޝްރޫއަކީ 138 މިލިއަން ރުފިޔާގެ މަޝްރޫއު އެކެވެ.

އާރުޑީސީން ގައްދޫގެ މަގުހެދުމުގެ މަސައްކަތް ފަށާފައިވަނީ، 17 ފެބްރުއަރީ 2020 ގައެވެ.