ފުރަތަމަ ފަހަރަށް ގައްދޫ ކައިރީގައި ކަނދުފައްޗެއް އަޅައިފި

ގދ. ގައްދޫ ކައިރީގައި ފުރަތަމަ ފަހަރަށް ކަނދުފައްޗެއް އަޅައިފި އެވެ.

ފިޝަރީޒް މިނިސްޓްރީން ގައްދޫ ކައިރީގައި އަޅާފައިވާ މި ކަނދުފައްޗަކީ ވަދު މަސްވެރިކަމަށް ހާއްސަ ކަނދުފައްޗެކެވެ. މި ކަނދުފަތި އަޅާފައިވަނީ ގދ.ގައްދޫގެ އިރު ދެކުނުން 4 މޭލު ބޭރުގައެވެ.

ފިޝަރީޒް މިނިސްޓްރީން ބުނެފައިވާގޮތުގައި މިއީ ގދ. ގައްދޫ ކައިރީގައި އެޅުނު ފުރަތަމަ ކަނދުފައްޗެވެ. މިކަނދު ފައްޗާއެކު މުޅި ރާއްޖޭގެ އެކި ސަރަހައްދުތަކުގައި ގާއިމް ކުރެވިފައިވާ ކަނދުފަތީގެ އަދަދު 83 އަށް އަރައެވެ. އޭގެތެރެއިން އެންމެ ފަހުން އަޅާފައިވާ 23 ކަނދުފައްޗަކީ މި ސަރުކާރުން އަޅާފައިވާ ކަނދުފައްޗެވެ.

މިއީ ކުދި އުޅަނދުފަހަރުގައި މަސްވެރިކަންކުރާ ފަރާތްތަކަށް ރަށާއި ކައިރިން ދެމެހެއްޓެނިވި ގޮތެއްގައި ރައްކާތެރިކަމާއިއެކު މަސްވެރިކަންކުރުމުގެ ފުރުޞަތު ފަހިކޮށްދިނުމަށް ފިޝަރީޒް މިނިސްޓްރީން ކުރަމުން އަންނަ މަސައްކަތެކެވެ.

ވަދު މަސްވެރިކަމަށް ޚާއްސަ ކަނދުފަތި ފަރުމާކޮށްފައިވަނީ ދޮށީގެ މަސްވެރިކަމަށް ޚާއްސަކޮށްފައިވާ ކަނދުފަތިތަކާއި ވަކިކުރުމަށް ފަސޭހަ އަދި ހޯދަން ފަސޭހަވާ ގޮތަށް "ރީނދޫ" ކުލައިގައެވެ. މިކަނދުފަތިތައް ޤާއިމްކުރަނީ ރަށްރަށުގެ ވަށައިގެން 3 މޭލާއި 6 މޭލާއި ދެމެދުގެ ދުރުމިނުގައެވެ.