މަހުމޫދުގެ މަރު - ރައްޔިތުން ތުހުމަތު ކުރި މީހުން ހައްޔަރުކުރީ ޑްރަގް ޓްރެފިކިން މައްސަލައެއްގައި

މިދިޔަ ބުރާސްފަތި ދުވަހު އއ ދަނގެތީގެ ފަޅު ގެއެއްގެ ތެރޭގައި ހުރި ވަޅެއްގެ ތެރެއިން މަރާލާފައި އޮއްވާ ފެނުނު މަހްމޫދު އަބޫބަކުރުގެ މަރާ ގުޅުމެއްވާ ކަމަށް އެ ރަށުގެ ރައްޔިތުން ތުހުމަތު ކުރާ ދެ މީހުން ހައްޔަރުކޮށްފައި ވަނީ ޑްރަގް ޓްރެފިކިންގެ މައްސަލައެއްގައި ކަން ހާމަވެއްޖެ އެވެ.

އެމައްސަލާގައި ރައްޔިތުން ތުހުމަތު ކުރީ އއ. ތޮއްޑޫއިން އެރަށަށް ދިޔަ ދެ ޒުވާނެއްގެ މައްޗަށެވެ. އެއީ އއ.ތޮއްޑޫ، ފޮރިންވިލާ، އަލީ ޖަމްޝާދު، 31 އާއި ހަމަ އެ ގޭ ޝާރިހް އަލީ، 20 އެވެ.

މަހުމޫދުގެ މަރުގައި އެ ދެ މީހުންގެ އަތެއްވާ ކަމަށް ތުހުމަތު ކުރެވިގެން ދަނގެތީގެ ރައްޔިތުން އެ ދެ މީހުން ހޯދައި، ފުލުހުންނާ ހަވާލުކުރިއެވެ. އަދި ފުލުހުންގެ ހިމާޔަތުގެ ދަށުން، ޖަމްޝާދާއި ޝާރިހުގެ އިތުރުން އެ ދެ މީހުންނާ ގުޅުން ހުރި އަންހެނަކަށް ފުލުހުން ހިމާޔަތް ދިނެވެ. ފަހުން އެ ދެމީހުން ވަނީ މަހިބަދޫއަށް ގެންގޮސްފައެވެ.

ބައެއް ނޫސްތަކުން ރިޕޯޓުކޮށްފައިވާ ގޮތުގައި މަހިބަދޫ މެޖިސްޓްރޭޓް ކޯޓުން ވަނީ މިހާރު އެ ތިން މީހުންގެ ބަންދަށް ވެސް މުއްދަތު ޖަހާފައެވެ. އެގޮތުން ޖަމްޝާދާއި ޝާރިހުއަށް މުއްދަތު ޖެހީ ޑްރަގް ޓްރެފިކިންގެ މައްސަލައެއްގައިކަން ވަނީ އެނގިފައެވެ.

މަޙްމޫދު މަރާލުމަށްފަހު އެއްލާލާފައި އޮއްވާ ފެނުނީ ދަނގެތީގެ ފަޅު ގެއެއްގެ ފެން ވަޅެއްގެ ތެރެއިންނެވެ. އެ މައްސަލައާ ގުޅިގެން ފުލުހުން މިހާތަނަށް ހައްޔަރުކޮށްފައި ވަނީ މުހައްމަދު ސާލިމް ކިޔާ ބަންގްލަދޭޝްގެ މީހެކެވެ. އަދި އޭނާގެ ބަންދަށް ވަނީ 15 ދުވަސް ޖަހާފައެވެ.

ސާލިމަކީ ދަނގެތީގައި އުޅޭ އުމުރުން ދުވަސްވީ މީހަކު ބަލަމުން ދިޔަ މީހެކެވެ. އަދި އޭނާ ދިރިއުޅެމުން ދިޔަ ގެ ހުންނަނީ މަހުމޫދު މަރައިލައިފައި އޮތް ގޭގެ ބިއްދޮށުގައިއެވެ.