ދަނގެތީގެ ކަރަންޓުގެ ކެޕޭސިޓީ އިތުރުކޮށްފި

އދ ދަނގެތީގައި ދެމުން އަންނަ ކަރަންޓުގެ ހިދުމަތުގެ ކެޕޭސިޓީ އިތުރުކޮށްފި އެވެ.

ދަނގެތީގައި ކަރަންޓުގެ ހިދުމަތް ދެމުން އަންނަނީ ސްޓެލްކޯއިން ނެވެ. އެކުންފުނިން މިއަދު ބުނީ މި އަހަރުގެ ޕީކް ސީޒަނަށާއި ރޯދަމަހަށް ތައްޔާރުވުމުގެ ގޮތުން މއެކުންފުނިން ކުރަމުންދާ މަސައްކަތްތަކުގެ ތެރެއިން، އދ. ދަނގެތީގައި އިތުރު ޖަނަރޭޓަރެއް ބަހައްޓައި އެ ޖަނަރޭޓަރު ކޮމިޝަން ކުރެވި މިހާރު ބޭނުން ކުރަން ފަށާފައިވާ ކަމަށެވެ.

އެގޮތުން އެރަށުގެ ކަރަންޓުގެ ވިއުގައާއި ގުޅާލާފައިވަނީ 400 ކިލޯވޮޓުގެ ޖަނަރޭޓަރެއް ކަމަށް ސްޓެލްކޯއިން ބުނެއެވެ. އަދި މިއާއިއެކު ދަނގެތީގައި ދެމުންދާ ކަރަންޓުގެ ޚިދުމަތުގެ ޔަޤީންކަން ވަނީ އިތުރަށް ކަށަވަރުކުރެވިފައިކަން އެކުންފުނިން ހާމަކުރެއެވެ.

ކުރިޔަށް އޮތް ރަމަޟާން މަހާއި ދިމާކޮށް ރާއްޖޭގެ އެކި ކަންކޮޅުތަކުގައި ކަރަންޓުގެ ހިދުމަތް މެދުކެނޑުމެއްނެތި ދިނުމަށްޓަކައި ރައީސް ޑރ މުހައްމަދު މުއިއްޒު ގެންގުޅުއްވާ ސިޔާސަތާއި އެކޮށް ސްޓެލްކޯއާއި ފެނަކައިން ދަނީ އެކުންފުނިތަކުން ދޭ ކަރަންޓުގެ ހިދުމަތުގެ ކެޕޭސިޓީތައް އިތުރުކުރުމަށް އިތުރު މަސައްކަތްތަކެއް ކުރަމުންނެވެ.