އެން.އޭ.ޕީ.ޑީ.އައި: 2027 ވަނަ އަހަރުގެ ވޯކްޕްލޭން އެކުލަވާލުމުގެ މަސައްކަތް ފަށައިފި

މިނިސްޓްރީ އޮފް ހެލްތު، ފެމިލީ އެންޑް ވެލްފެއަރ އިން، "ނޭޝަނަލް އެކްޝަން ޕްލޭން އޮން ޑިސެބިލިޓީ އިންކްލޫޝަން" (އެން.އޭ.ޕީ.ޑީ.އައި) 2026-2030 ގެ ދަށުން، 2027 ވަނަ އަހަރަށް ކަނޑައަޅާ ވޯކްޕްލޭންގެ މަސައްކަތްތައް ނިންމުމަށްޓަކައި ޓެކްނިކަލް ކޮމިޓީގެ ބައްދަލުވުމެއް ކުރިއަށްގެންގޮސްފިއެވެ.

މި ބައްދަލުވުމުގައި 2027 ވަނަ އަހަރުގެ ތާވަލުގައި ހިމަނާނެ ވަކިވަކި ހަރަކާތްތައް ފައިނަލް ކުރުމުގެ މަސައްކަތް ކުރިއަށްދާނެއެވެ. މި ސެޝަން ބިނާވެފައިވަނީ ޖޫން 2026 ގައި އެން.އޭ.ޕީ.ޑީ.އައިގެ ސްޓިއަރިންގ ކޮމިޓީން ކަނޑައެޅި އިސްކަންދޭނެ ދާއިރާތަކުގެ މައްޗަށެވެ.

އެން.އޭ.ޕީ.ޑީ.އައި އަކީ ނުކުޅެދުންތެރިކަން ހުންނަ ފަރާތްތަކުގެ ޙައްޤުތާބެހޭ ބައިނަލްއަޤުވާމީ މުޢާހަދާ (ސީ.އާރު.ޕީ.ޑީ) އަށް ރިއާޔަތްކޮށް، ސިއްޙީ ދާއިރާ، ތަޢުލީމު، ވަޒީފާގެ ފުރުޞަތުތައް އަދި އާންމު ވަޞީލަތްތަކަށް ވާސިލުވެވޭނެ މަގުތައް ފަހިކޮށްދިނުމާއި ހަމަހަމަކަން ކަށަވަރުކޮށްދިނުން ފަދަ މުހިންމު ދާއިރާތަކުން ނުކުޅެދުންތެރިކަން ހުންނަ ފަރާތްތައް މުޖުތަމަޢުގައި ޝާމިލުކުރުމަށް ސަރުކާރުން ކުރިއަށްގެންދާ ފަސް އަހަރުގެ ޤަޢުމީ އެކްޝަން ޕްލޭންއެކެވެ.

މި ބައްދަލުވުމުގައި، އެން.އޭ.ޕީ.ޑީ.އައިގެ ދަށުން ކުރިއަށްގެންދާ ޙަރަކާތްތައް ތަންފީޛުކުރުމުގައި ބައިވެރިވާ ސަރުކާރުގެ ކަމާބެހޭ އިދާރާތަކުގެ ފަންނީ ބޭފުޅުންނާއި، ކަމާގުޅޭ އެހެނިހެން މުއައްސަސާތަކުގެ މަންދޫބުން ވަނީ ބައިވެރިވެވަޑައިގެންފައެވެ. މި ޓެކްނިކަލް ކޮމިޓީގައި ހިމެނޭ މުހިންމު އިދާރާތަކުގެ ތެރޭގައި މިނިސްޓްރީ އޮފް ހެލްތް، ފެމިލީ އެންޑް ވެލްފެއަރ، މިނިސްޓްރީ އޮފް އެޑިއުކޭޝަން، މިނިސްޓްރީ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް، މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، ސިއްޙީ ޚިދުމަތްދޭ މަރުކަޒުތައް، އާސަންދަ، ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ އިތުރުން ނުކުޅެދުންތެރިކަން ހުންނަ ފަރާތްތަކުގެ ޙައްޤުތަކަށް މަސައްކަތްކުރާ ޖަމިއްޔާތަކާއި މަދަނީ ޖަމިއްޔާތައް ހިމެނެއެވެ.