"ދަ ރޫކީ" ގެ އާ ސީޒަން އައުމުގެ ކުރިން ބޮޑު ރެކޯޑެއް!

އޭބީސީގެ މަޝްހޫރު ކްރައިމް ޑްރާމާ ސީރީޒް "ދަ ރޫކީ" އިން ސްޓްރީމިންގ ޕްލެޓްފޯމްތަކުގައި ބޮޑު ކާމިޔާބީއެއް ހޯދައިފިއެވެ.

ފަހުގެ ރިޕޯޓުތައް ބުނާގޮތުން، 2026 ވަނަ އަހަރުގެ ޖެނުއަރީން ފެށިގެން ޖޫން މަހުގެ ނިޔަލަށް އެއްކޮށްފައިވާ ނީލްސަން ގެ ސްޓްރީމިންގ ޑޭޓާއަށް ބަލާއިރު، މި ޝޯއަށް ވަނީ 12.817 ބިލިއަން މިނެޓުގެ ވިއުސް ލިބިފައެވެ.

މި އަދަދާއެކު "ދަ ރޫކީ" ވަނީ އެންމެ ގިނައިން މީހުން ބެލި ޝޯތަކުގެ ލިސްޓުގެ 12 ވަނައިގައި ހިމެނިފައެވެ.

މިއީ ޓީވީގެ ތާރީޚުގައި އެންމެ ގިނަ ދުވަސްވީ ބޮޑެތި ކްރައިމް ފްރެންޗައިޒްތަކަށް ވުރެ ވެސް ބޮޑު ކާމިޔާބީއެކެވެ. މިސާލަކަށް، ހުލޫ އިން "ދަ ރޫކީ" ގެ އެންމެ 144 އެޕިސޯޑު ފެންނަން ހުރިއިރު، 596 އެޕިސޯޑު ހިމެނޭ "ލޯ އެންޑް އޯޑަރ: އެސްވީޔޫ" އަށް ލިބިފައިވަނީ 11.952 ބިލިއަން މިނެޓުގެ ވިއުސްއެވެ. އަދި 508 އެޕިސޯޑު ހިމެނޭ "އެންސީއައިއެސް" އަށް 11.870 ބިލިއަން މިނެޓު ލިބިފައިވާއިރު، އަސްލު "ލޯ އެންޑް އޯޑަރ" އަށް ލިބިފައިވަނީ 11.387 ބިލިއަން މިނެޓެވެ. މި ހުރިހާ ޝޯއެއްގެ ވެސް އެޕިސޯޑުތައް ގިނަވެފައި އައު ސީޒަންތަކެއް ދައްކަމުން ދިޔަ ނަމަވެސް، "ދަ ރޫކީ" އިން ވަނީ މި ޝޯތަކަށް ވުރެ ކުރި ހޯދާފައެވެ.

މި ކާމިޔާބީއަކީ "ދަ ރޫކީ" ގެ އައު ސީޒަނަށް ޕްރޮޑަކްޝަންގެ މަސައްކަތްތައް ފަށަމުން އަންނަ ދަނޑިވަޅެއްގައި ލިބުނު ވަރަށް އުފާވެރި ޚަބަރެކެވެ.

މިއަހަރުގެ އޭޕްރީލް މަހު ސީޒަން 9 އަށް ސީރީޒް އާކޮށްފައިވާއިރު، ސީޒަން 8 ގެ ފަހު އެޕިސޯޑު ވެގެން ގޮސްފައިވަނީ ނެޓްވޯކް ޓީވީގެ އެންމެ ކާމިޔާބު އެއް ފިނާލޭއަށެވެ.

"ދަ ރޫކީ" ގެ 9 ވަނަ ސީޒަން ސްކްރީންތަކަށް އަންނާނެކަމަށް ބެލެވެނީ 2027 ވަނަ އަހަރުގައެވެ.