382 ބައިވެރިންނާއެކު ނައިފަރުގައި ބޭއްވި "ނައިބޮލި މަދަހަ މުބާރާތް 2026" ކާމިޔާބުކަމާއެކު ނިންމާލައިފި

ޅ. ނައިފަރު ކައުންސިލުން އިންތިޒާމުކޮށްގެން ކުރިއަށްގެންދިޔަ "ނައިބޮލި މަދަހަ މުބާރާތް 2026" ގެ ނިންމުމުގެ ރަސްމިއްޔާތު ރޭ ނައިފަރުގެ މަލްޓި ޕާޕަސް ހޯލްގައި ބާއްވައި، މުބާރާތުގެ ވަނަވަނައަށް ހޮވުނު ފަރާތްތަކަށް އިނާމާއި ހަނދާނީ ލިޔުން ހަވާލުކޮށްފިއެވެ.

2022 ވަނަ އަހަރުން ފެށިގެން ނައިފަރު ކައުންސިލުން މެދުނުކެނޑި ބާއްވަމުން އަންނަ މި މުބާރާތުގައި މިއަހަރު ޖުމްލަ 382 ބައިވެރިން ވަނީ ބައިވެރިވެފައެވެ. އެގޮތުން ސްކޫލް ދަރިވަރުންނާއި އިސްރަށްވެހީން ހިމެނޭހެން 24 ވަކިވަކި ހުށަހެޅުމާއި 36 ގުރޫޕު ހުށަހެޅުން މި މުބާރާތުގައި ފެނިގެން ގޮސްފައިވެއެވެ.

މީގެއިތުރުން، ޚާއްޞަ އެހީއަށް ބޭނުންވާ މީހުންނަށް ޚާއްޞަކޮށްގެން ކުރިއަށްގެންދިޔަ "އަލިމަސް ކެޓެގަރީ" ގެ މަދަހަ ހުށަހެޅުންތައްވެސް މިއަހަރުގެ މުބާރާތުގައި ވަނީ ކުރިއަށް ގޮސްފައެވެ.

މި މުބާރާތުގެ ނިންމުމުގެ ހަފްލާ ޝަރަފުވެރިކޮށްދެއްވީ ދިވެހިބަހާއި ތަރިކައާއި ކަލާސީނާ ބެހޭ ވަޒީރު ހީނާ ވަލީދެވެ.

މިއީ ނައިފަރުގެ ރައްޔިތުންގެ މެދުގައި ބޮޑު މަޤްބޫލުކަމެއް ލިބިފައިވާ އަދި އިސްލާމީ އަޚުލާޤާއި މަދަހަ ކިޔުމުގެ ހުނަރު ދިރުވައިއާކުރުމަށް ބާއްވާ މުހިންމު މުބާރާތެކެވެ.