އެމެރިކާގެ ހަމަލާތަކާ ގުޅިގެން އީރާނުގެ ދެކުނުގެ ސަރަހައްދުތަކުގެ ދަރިވަރުންގެ އިމްތިހާންތައް ފަސްކޮށްފި

އެމެރިކާއިން ދެމުންދާ ހަމަލާތަކާއި، މަސްރަހު އިތުރަށް ގޯސްވެދާނެކަމުގެ ބިރު އޮތުމުގެ ސަބަބުން، އީރާނުގެ ހޮރްމުޒްގާން، ބުޝެހްރު، ޚޫޒެސްތާން، އަދި ސިސްތާން އެންޑް ބަލޫޗިސްތާން ޕްރޮވިންސްތަކުގައި ސާނަވީ ތައުލީމު ނިންމާ ދަރިވަރުންގެ ފަހު އިމްތިހާންތައް ފަސްކޮށްފިއެވެ.

އެ ގައުމުގެ އެޑިއުކޭޝަން މިނިސްޓްރީން ބުނި ގޮތުގައި އީރާނުގެ ހޮރްމުޒްގާން، ބުޝެހްރު، ޚޫޒެސްތާން، އަދި ސިސްތާން އެންޑް ބަލޫޗިސްތާން ޕްރޮވިންސްތަކުގައި ސާނަވީ ތައުލީމު ނިންމާ ދަރިވަރުންގެ ފަހު އިމްތިހާންތައް ފަސްކުރި ނަމަވެސް، އެހެން ޕްރޮވިންސްތަކުގައި ފަހު އިމްތިހާންތައް ކުރިއަށްދާނީ އާންމު އުސޫލުންނެވެ.

އަންނަ ހަފުތާއާ ހަމައަށް އެއްބަސްވުމަކަށް ނާދެވިއްޖެ ނަމަ، އީރާނުގެ އާންމު ތަންތަނަށް އެމެރިކާއިން ބޮން އަޅާނެ ކަމަށް ރައީސް ޓްރަމްޕް ވަނީ ވިދާޅުވެފައެވެ. ނަމަވެސް، އެމެރިކާއިން މިހާރުވެސް ދަނީ އީރާނުގެ ދެކުނު އައްސޭރިފަށުގެ އެކި ސަރަހައްދުތަކަށް ބޮން އަޅަމުންނެވެ.

އަދި މި ހަމަލާތަކުގެ އެންމެ ބޮޑު ނުރައްކަލަކާއި ތަކްލީފެއް ކުރިމަތިވަމުންދަނީ އެ ސަރަހައްދުތަކުގައި ދިރިއުޅޭ އާންމު ރައްޔިތުންނަށެވެ.

ހަމަލާތައް ހުއްޓުވުމަށް، މެދުވެރިއެއްގެ ދައުރު އަދާކުރާ ޕާކިސްތާނުން، އެމެރިކާއާއި އީރާނާ ދެމެދު އަލުން މަޝްވަރާތައް ފެށުމަށް ބާރުއަޅަމުންދާކަން ފާހަގަކުރެވެއެވެ.

ޕާކިސްތާނުގެ ޚާރިޖީ ވުޒާރާއިން ބުނާ ގޮތުގައި، މިދިޔަ މަހު ސޮއިކުރެވުނު ފަހުމުނާމާ (އެމް.އޯ.ޔޫ) ގެ ދަށުން، ހަނގުރާމަ ހުއްޓާލައި އަލުން މަޝްވަރާތައް ފެށުމަށް އެމެރިކާއާއި އީރާނަށް އެ ގައުމުން ދަނީ ބާރު އަޅަމުންނެވެ.

"މި ފަހުމުނާމާ ތަންފީޒުކުރުމުގައި ގޮންޖެހުންތަކެއް ހުރި ނަމަވެސް، އަނިޔާވެރިކަން ނިމުމަކަށް ގެނެސް ފަންނީ ފެންވަރުގެ މަޝްވަރާތައް އަލުން ފެށުމަށް ހުރިހާ ފަރާތްތަކަކަށް ޕާކިސްތާނުން ހިތްވަރުދެމުން ގެންދާނެ،" އިސްލާމްއާބާދުގައި ނޫސްވެރިންނާ ވާހަކަދައްކަވަމުން ތަރުޖަމާނު ތާހިރު އަންދްރާބީ ވިދާޅުވިއެވެ.

ފެބްރުއަރީ 28 ގައި ހަނގުރާމަ ފެށުނީއްސުރެ، ޕާކިސްތާނުން އަންނަނީ މެދުވެރިއެއްގެ ގޮތުން މުހިންމު ދައުރެއް އަދާކުރަމުންނެވެ. އެގޮތުން އޭޕްރިލް މަހު ބޭއްވި މަޝްވަރާތަކަކީ ފާއިތުވި ސާޅީސް އަހަރު ތެރޭގައި އެމެރިކާއާއި އީރާނުގެ މަންދޫބުން އެއް މޭޒެއްގެ ދޮށުގައި ބައްދަލުވި ފުރަތަމަ ފަހަރެވެ.

ޖޫން މަހު، އީރާނުގެ ރައީސް ޕެޒެޝްކިއަން އާއި ޑޮނަލްޑް ޓްރަމްޕްގެ އިތުރުން ޕާކިސްތާނުގެ ބޮޑުވަޒީރު ޝެހްބާޒް ޝަރީފް ސޮއިކުރެއްވި ވަގުތީ އެއްބަސްވުން އެކުލަވާލުމުގައި ޕާކިސްތާނުން އެހީތެރިވެދިނެވެ. އެއަށްފަހު އެ އެއްބަސްވުމާ މެދު ސްވިޒަލޭންޑްގެ ބާގަންސްޓޮކް ސަމިޓުގައި ވަނީ މަޝްވަރާކޮށްފައެވެ.