ވިލިމާލޭގައި "މާލެ ޓެކްސީ ލައިން" ގެ ޚިދުމަތް ފެށުމަށް އެންމެފަހުގެ ތައްޔާރީތައް ކުރިއަށް!

ވިލިމާލޭގެ ރައްޔިތުންނަށް ތިމާވެއްޓާ ރައްޓެހި ދަތުރުފަތުރުގެ ފަސޭހަ ނިޒާމެއް ގާއިމުކޮށްދިނުމުގެ ގޮތުން ފެށުމަށް ހަމަޖެހިފައިވާ "މާލެ ޓެކްސީ ލައިން" ގެ ޚިދުމަތް ރަސްމީކޮށް ލޯންޗުކުރުމަށް އެންމެފަހުގެ ތައްޔާރީތައް އެމްޓީސީސީއިން ފަށައިފިއެވެ.

މި ޚިދުމަތް ފެށުމުގެ ގޮތުން ވާންޖެހޭ އެންމެފަހުގެ ތައްޔާރީތައް ބައްލަވާލެއްވުމަށްޓަކައި އެމްޓީސީސީގެ މެނޭޖިންގ ޑިރެކްޓަރ، ޑީސީޕީ (ރިޓަޔަރޑް) އަޙްމަދު ސަޢުދީ އަދި ވިލިމާލޭ ދާއިރާގެ ރައްޔިތުންގެ މަޖިލިސް މެންބަރު މުޙައްމަދު އިސްމާޢީލްގެ އިތުރުން އެ ކުންފުނީގެ އިސްވެރިން މިއަދު ވަނީ ވިލިމާލެއަށް ޒިޔާރާތްކޮށްފައެވެ.

މި އައު ޚިދުމަތަކީ ވިލިމާލޭގެ އެތެރޭގެ ދަތުރުފަތުރުގެ ނިޒާމު ހަރުދަނާކޮށް، ޚާއްޞަކޮށް އުމުރުން ދުވަސްވީ މީހުންނަށާއި، ބަލިމީހުންނަށް، އަދި ފެރީ ޓާމިނަލުން ގޭގެއަށް ބަރު މުދާ އުފުލުމުގައި އާންމު ރައްޔިތުންނަށް ދިމާވަމުންދާ ދަތިތަކަށް ދާއިމީ ޙައްލެއް ހޯދައިދިނުމަށް ފަށާ ޚިދުމަތެކެވެ.

ވިލިމާލެއަކީ އިންޖީނުލީ އުޅަނދުތައް ދުއްވުން މަނާ، ތިމާވެށި ހިމާޔަތްކޮށްފައިވާ ރަށަކަށްވުމުން، މި ޓެކްސީ ޚިދުމަތް ފަރުމާކޮށްފައިވަނީ ރަށުގެ ގުދުރަތީ މާހައުލަށް އެއްވެސް ގެއްލުމެއް ނުލިބޭނެ ފަދަ ގޮތަކަށެވެ.

އެގޮތުން ވިލިމާލޭގައި ބޭނުންކުރުމަށް ހަމަޖެހިފައިވާ "މާލެ ޓެކްސީ ލައިން" ގެ ފްލީޓްގައި ހިމެނެނީ މުޅިންވެސް ތިމާވެއްޓާ ރައްޓެހި، ދުމުގެ އަސަރެއް ނުހުންނަ އިލެކްޓްރިކް (އީވީ) އުޅަނދުތަކެވެ. އަދި 24 ގަޑިއިރު މެދުކެނޑުމެއްނެތި ޚިދުމަތް ދިނުމަށްޓަކައި އުޅަނދުތައް ޗާޖުކުރާނެ އިންފްރާސްޓްރަކްޗަރވެސް ރަށުގެ އެކި ސަރަހައްދުތަކުގައި މިހާރު ވަނީ ފުރިހަމައަށް ގާއިމުކޮށްފައެވެ.

އެމްޓީސީސީއިން ހާމަކުރާ ގޮތުގައި، ކުރިއަށް އޮތް މަދު ދުވަސްކޮޅެއްގެ ތެރޭގައި މި ޚިދުމަތް ރަސްމީކޮށް ފަށާނެ ތާރީޚާއި، ދަތުރުތަކަށް ނަގާނެ ފިކްސްޑް އަގުތަކުގެ އިތުރުން، ބުކިންގ ހަދާނެ ޚާއްޞަ ހޮޓްލައިން ނަންބަރުތައް އާންމުކޮށް އިޢުލާން ކުރާނެއެވެ.