އެމްއެންޑީއެފް ފަޔަރ އެންޑް ރެސްކިޔުއިން ނިމުނު ހަފުތާގައި 16 ހާދިސާއަކަށް އެޓެންޑްކޮށްފި

މި ހިނގާ ޖޫން މަހުގެ 7 އިން 13 އަށް ދިވެހިރާއްޖޭގެ އެކި ސަރަހައްދުތަކުގައި ހިނގި އެކިއެކި ކުއްލި ބޭނުންތަކާއި ނުރައްކާތެރި ހާދިސާތަކާ ގުޅިގެން، އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ޖުމްލަ 16 ހާދިސާއަކަށް އެޓެންޑްކޮށް އެހީތެރިކަން ފޯރުކޮށްދީފިއެވެ.

އެމްއެންޑީއެފްއިން އާންމުކޮށްފައިވާ ނިމުނު ހަފުތާގެ ތަފާސްހިސާބުތަކަށް ބަލާއިރު، އެންމެ ގިނައިން ރިޕޯޓުކޮށްފައިވަނީ އަލިފާނުގެ ހާދިސާތަކާއި ބަލިމީހުން އުފުލުމުގެ ހާދިސާތަކެވެ.

އެގޮތުން ނިމިދިޔަ ހަފުތާގެ ތެރޭގައި އަލިފާނުގެ ޖުމްލަ 5 ހާދިސާއެއް ހިނގައިގެން ފަޔަރފައިޓަރުން ހަރަކާތްތެރިވެފައިވާއިރު، ކަނޑުމަގުންނާއި ވައިގެމަގުން ބަލިމީހުން ކުއްލި ހާލަތުގައި އުފުލުމުގެ 5 އޮޕަރޭޝަންވެސް ވަނީ ހިނގާފައެވެ. މީގެ އިތުރުން ނުރައްކާތެރި ކެމިކަލް ނުވަތަ ގޭސް ފަދަ ތަކެއްޗާ ގުޅުންހުރި (ހެޒްމެޓް) 2 ހާދިސާއަކާއި، ތިމާވެށީގެ ނުވަތަ ގުދުރަތީ ކާރިސާތަކާ ގުޅުންހުރި (ޑިޒާސްޓަރ) 2 ހާދިސާއެއްގެ އިތުރުން، ކަނޑުމަތީގެ ނުވަތަ އެއްގަމުގެ ރެސްކިޔު 1 ހާދިސާއަކާއި އެހެނިހެން ބާވަތުގެ 1 ހާދިސާއަކަށް ސިފައިން ވަނީ އެޓެންޑްކޮށްފައެވެ.

މި ހާދިސާތައް ރާއްޖޭގެ ސަރަހައްދުތަކަށް ބެހިގެންގޮސްފައިވާ ގޮތަށް ބަލާއިރު، އެންމެ ގިނަ ހާދިސާތައް ހިނގާފައިވަނީ އާބާދީ ބޮޑު މާލެ ސަރަހައްދުގައެވެ. އެގޮތުން އެމްއެންޑީއެފް މާލޭ އޭރިއާ ކޮމާންޑުން ޖުމްލަ 13 ހާދިސާއަކަށް އެޓެންޑްކޮށްފައިވާއިރު، ސަދަން އޭރިއާ ކޮމާންޑުން 2 ހާދިސާއެއް އަދި ނޮދަން އޭރިއާ ކޮމާންޑުން 1 ހާދިސާއަކަށް ވަނީ އެޓެންޑްކޮށްފައެވެ. މި މުއްދަތުގެ ތެރޭގައި ސެންޓްރަލް އޭރިއާ ކޮމާންޑް ސަރަހައްދުން އެއްވެސް ހާދިސާއެއް ރިޕޯޓުކޮށްފައެއް ނުވެއެވެ.

ދިވެހި ސިފައިންގެ ފަޔަރ އެންޑް ރެސްކިޔު ސަރވިސްއިން އަބަދުވެސް ދަނީ ރައްޔިތުންގެ ފުރާނައާއި މުދާ ސަލާމަތްކުރުމުގައި 24 ގަޑިއިރު މެދުކެނޑުމެއްނެތް ޚިދުމަތްތަކެއް ފޯރުކޮށްދެމުންނެވެ.