ކާމިޔާބީއަށްފަހު ނަޝީދު: މިއީ ރާއްޖޭގެ ޑިމޮކްރަސީއަށާއި އިޞްލާޙީ މަސައްކަތްތަކަށް ލިބުނު ބޮޑު މޮޅެއް!

އެމްޑީޕީގެ ޗެއަރޕާސަން އިންތިޚާބު ބޮޑު އަޣްލަބިއްޔަތަކުން ކާމިޔާބު ކުރެއްވުމަށްފަހު، އެ ޕާޓީގެ އައު ޗެއަރޕާސަން ރައީސް މުޙައްމަދު ނަޝީދު، ޕާޓީގެ ލޮބުވެތި ޢާންމު މެންބަރުންނަށާއި އެމަނިކުފާނުގެ ކެމްޕޭން ޓީމަށް ނުހަނު ފުން ޝުކުރެއް އަދާކުރައްވައިފިއެވެ.

އިންތިޚާބުގެ ނަތީޖާއިން ބޮޑު ކުރިއެރުމެއް ލިބިވަޑައިގަތުމާއެކު، ސޯޝަލް މީޑިއާ އެކްސްގައި ކުރެއްވި ޕޯސްޓެއްގައި ރައީސް ނަޝީދު ވަނީ މިއީ ދިވެހިރާއްޖޭގެ ޑިމޮކްރަސީއަށާއި އިޞްލާޙީ މަސައްކަތްތަކަށް ލިބިގެންދިޔަ ވަރަށް ބޮޑު ކުރިއެރުމެއް ނުވަތަ "ބޮޑު މޮޅެއް" ކަމަށް ސިފަކުރައްވާފައެވެ.

ރައީސް ނަޝީދުގެ ޚާއްޞަ މެސެޖުގައި، މި އިންތިޚާބަކީ އެމްޑީޕީގެ ސިޔާސީ މިސްރާބު އަލުން ކަނޑައެޅުމަށް ބޭއްވުނު މުހިންމު ފެށުމެއްކަން ހާމަކުރައްވައި، ރާއްޖޭގެ އެކި ކޮޅުތަކުގައި "ބޮޑު ބަދަލު" ކެމްޕޭން ޓީމުން ކުރި ބުރަ މަސައްކަތް ވަނީ ވަރަށް ބޮޑަށް ބަލައިގަންނަވާފައެވެ. އެމަނިކުފާނު ވިދާޅުވީ، ޕާޓީގެ ޢާންމު މެންބަރުން މިއަދު ނިކުމެ ދެއްކެވި ސާބިތުކަމަކީ ޕާޓީގެ ހިންގުން ހަރުދަނާކޮށް، ކުރިއަށް އޮތް ސިޔާސީ މައިދާނަށް ބާރާއެކު ނިކުތުމަށް ލިބުނު ރަން ފުރުޞަތެއް ކަމަށެވެ.

މި އިންތިޚާބުގައި އެމަނިކުފާނާ ވާދަކުރެއްވި ގަލޮޅު ދެކުނު ދާއިރާގެ މެންބަރު މީކާއިލް އަޙްމަދު ނަސީމް ދެއްކެވި ވާދަވެރިކަމަށާއި ހިތްވަރަށްވެސް ރައީސް ނަޝީދު ވަނީ ވަރަށް މާތް ރޫޙެއްގައި ތަޢުރީފު ކުރައްވާފައެވެ. އެގޮތުން އިންތިޚާބުގައި ވާދަކުރެއްވި ކެންޑިޑޭޓް މީކާއިލް ނަސީމަށްވެސް އެމަނިކުފާނު ވަނީ ޚާއްޞަ މަރުޙަބާއެއް ވިދާޅުވެފައެވެ.

އެމްޑީޕީގެ ޗެއަރޕާސަންކަމުގެ މަޤާމުން ފައްޔާޒް އިސްމާޢީލް އިސްތިއުފާ ދެއްވުމާ ގުޅިގެން ބޭއްވުނު މި ކުއްލި އިންތިޚާބު ރައީސް ނަޝީދު ކާމިޔާބު ކުރެއްވިއިރު، ފައްޔާޒްވެސް ވަނީ މި އިންތިޚާބުގައި ރައީސް ނަޝީދަށް ފާޅުގައި ތާއީދުކުރައްވާފައެވެ.