ބެންކޮކް ރޭލު އެކްސިޑެންޓް: ރޭލު ދުއްވަން އިން މީހާ މަސްތުވާތަކެއްޗަށް ޕޮޒިޓިވްވެއްޖެ

ބެންކޮކްގައި ފަސިންޖަރުން އުފުލާ ބަހެއްގައި ރޭލަކުން ޖެހި، ހިނގި ނުރައްކާތެރި އެކްސިޑެންޓްގައި ރޭލު ދުއްވަން އިން މީހާ މަސްތުވާތަކެއްޗަށް ޕޮޒިޓިވްވެފައިވާ ކަމަށާއި، އޭނާގެ މައްޗަށް ފަރުވާކުޑަކޮށް ދުއްވުމުގެ ދައުވާ އުފުލައިފި ކަމަށް ތައިލޭންޑްގެ ކަމާބެހޭ ފަރާތްތަކުން ހާމަކޮށްފިއެވެ.

ހޮނިހިރު ދުވަހުގެ މެންދުރުފަހު "އަސޯކް-ދިން ޑެންގް" ރޭލު ހުރަހުގައި ހިނގި މި ހާދިސާގައި، މުދާ އުފުލާ ރޭލު ގޮސް ޖެހުނީ ޓްރެފިކް ބާރުބޮޑުވުމުގެ ސަބަބުން ރޭލު ދަނޑިމަތީގައި ތާށިވެފައި އޮތް އާންމު ބަހެއްގައެވެ. މި ހާދިސާގައި ބަހުގައި ރޯވެ، 8 މީހުން މަރުވެ، އެތައް ބަޔަކު ވަނީ ޒަހަމްވެފައެވެ.

އިބްތިދާއީ ރިޕޯޓްތައް ބުނާގޮތުން، ބަސް ތާށިވީ އެ ސަރަހައްދުގެ ބާރުބޮޑު ޓްރެފިކްގެ ސަބަބުންނެވެ. އަދި ޓްރެފިކް ބޮޑުވުމުގެ ސަބަބުން ރޭލު އަންނައިރު ތިރިކުރާ ހުރަސްކުރާ ބެރިއަރުތައް އެދެވޭ ގޮތެއްގައި ތިރިކުރެވޭ ގޮތް ވަނީ ނުވެފައެވެ. "އަސޯކް-ދިން ޑެންގް" ރޭލު ހުރަހަކީ ބެންކޮކްގެ އެންމެ ކާރޫބާރޫ ބޮޑު އެއް އިންޓަރސެކްޝަނަށް ދާން އޮންނަ، އަބަދުވެސް ވަރަށް ބާރުބޮޑު ސަރަހައްދެކެވެ.

ފުލުހުން މައުލޫމާތު ދޭ ގޮތުގައި، ރޭލު ދުއްވަން އިން މީހާގެ އިތުރުން، ބަސް ދުއްވަން އިން މީހާއާއި، ރޭލު ހުރަހުގެ ބެރިއަރު އަތުން ތިރިކުރަން ހުންނަ ގާޑުގެ މައްޗަށްވެސް މިހާރު ވަނީ ދައުވާ އުފުލާފައެވެ. ނަމަވެސް، ރޭލު ދުއްވަން އިން މީހާގެ ކުޑަކަމުދާ ތަކެތި ޓެސްޓުކުރިއިރު ޕޮޒިޓިވްވީ ކޮން ބާވަތެއްގެ މަސްތުވާތަކެއްޗަކަށް ކަމެއް ފުލުހުން ހާމައެއް ނުކުރެއެވެ.

ތައިލޭންޑްގެ ރޭލް ޓްރާންސްޕޯޓް ޑިޕާޓްމަންޓްގެ ޑިރެކްޓަރ ޖެނެރަލް ޕިޗެޓް ކުނަދަމްރަކްސް ވިދާޅުވީ، މި ހާދިސާއާ ގުޅިގެން ރޭލު ދުއްވާ ހުރިހާ މުވައްޒަފުންނާއި ރޭލުވޭގެ ސްޓާފުން ޑިއުޓީއަށް ނުކުތުމުގެ ކުރިން މަސްތުވާތަކެއްޗާއި އަލްކޮހޯލްއަށް ޓެސްޓުކުރުން މިހާރު މަޖުބޫރުކޮށްފައިވާ ކަމަށެވެ.

ތައި ޕީބީއެސް (Thai PBS) އިން ރިޕޯޓްކޮށްފައިވާ ގޮތުގައި، ރޭލުގެ ބްލެކް ބޮކްސްއިން ލިބުނު މައުލޫމާތުތަކަށް ބަލާއިރު، ރޭލުގެ ކުއްލި ބްރޭކް ސިސްޓަމް ޖައްސާފައިވަނީ ބަހާ ގާތްގަނޑަކަށް 100 މީޓަރު (330 ފޫޓު) ކައިރިވި ފަހުންނެވެ. ނަމަވެސް އެ ދުރުމިނަކީ އެވަރުގެ ބޮޑު ރޭލެއް އެކްސިޑެންޓުން ސަލާމަތްކުރަން ހުއްޓުވޭނެ ވަރުގެ ދުރުމިނެއް ނޫން ކަމަށް ޕިޗެޓް ވިދާޅުވިއެވެ.