ތައިލޭންޑުގެ ޑޭ ކެއާ ސެންޓަރަކެއްގައި ބަޑީގެ ހަމަލާތަކެއް - ކުޑަކުދިންނާއެކު 34 މީހަކު މަރުވެއްޖެ

ތައިލެންޑްގައި ބުރާސްފަތި ދުވަހު ޑޭ-ކެއަރ ސެންޓަރެއްގައި ދިން ބަޑީގެ ހަމަލާތަކެއްގައި 34 މީހުން މަރުވެފައިވާ ކަމަށް އެގައުމުގެ ފުލުހުން ބުނެފިއެވެ.

މީޑިއާ ރިޕޯޓުތައް ބުނާ ގޮތުގައި މަރުވެފައިވާ މީހުންގެ ތެރޭގައި 22 ކުޑަކުދިން ހިމެނޭ އިރު އޭގެ ތެރޭގައި އުމުރުން 2 އަހަރުގެ ކުޑަކުދިންވެސް ހިމެނެއެވެ. އެ ޑިސްޓްރިކްޓްގެ އޮފިޝަލެއް ކަމަށްވާ ޖިދާޕާ ބޫންސޯމް ރޮއިޓާސްއަށް މައުލޫމާތު ދެމުން ބުނީ ބަޑީގެ ހަމަލާދިން މީހާ އެތަނަށް ވަނީ މެންދުރުގެ ކެއުމުގެ ގަޑީގައި ކަމަށާއި، އެވަގުތު އެތަނުގައި 30 ވަރަކަށް ކުޑަކުދިން ތިބި ކަމަށެވެ.

ޖިދާޕާ ބުނި ގޮތުގައި އެ މީހާ އެންމެ ފުރަތަމަ ޝޫޓްކުރީ ހަތަރު ފަސް ސްޓާފަކަށް ކަމަށާއި އޭގެ ތެރޭގައި އަށް މަހުގެ މާބަނޑު ޓީޗަރެއް ވެސް ހިމެނޭ ކަމަށެވެ.

ސޯޝަލް މީޑިއާގައި ޕޯސްޓްކޮށްފައިވާ ވީޑިއޯތަކުން ފެންނަ ގޮތުގައި، ނޮންގް ބުއާ ލަމްޕޫގެ އުތުރުއިރުމަތީ ޕްރޮވިންސްގެ އުތައި ސަވާން ނަމަކަށް ކިޔާ އަވަށުގައި ހުންނަ އެ ސެންޓަރުގައި ދިން ބަޑީގެ ހަމާލާގައި މަރުވި ކުދިން ހަށިތައް ފޮތިން ފޮރުވާފައިވާއިރު، ފޮތިތައް ހުރީ ލެއިން ތަތްތެޅިފައެވެ.

ފުލުހުން ބުނީ ޝޫޓަރު ހޯދުމުގެ މަސައްކަތް މިހާރު ފަށާފައިވާ ކަމަށާއި ކުށްވެރިޔާ އަތުލައިގަތުމަށް ބޮޑުވަޒީރު ހުރިހާ އޭޖެންސީތަކަށް އެލާޓް ކުރެއްވި ކަމަށެވެ.

ނާ ކްލަންގް ޕޮލިސް ސްޓޭޝަންގެ ސުޕްރިންޓެންޑެންޓް ޗަކްރަޕަތު ވިޗިތުވިދިޔާ ވިދާޅުވީ، ބަޑީގެ ހަމަލާދިން މީހާ އަކީ މިދިޔަ އަހަރު ފުލުހުންގެ ވަޒީފާއިން ވަކިކޮށްފައިވާ މީހެއް ކަމަށެވެ.

ތައިލޭންޑު ސަރަހައްދުގެ ބައެއް އެހެން ގައުމުތަކާ އަޅާބަލާއިރު ބަޑީގެ މިލްކުވެރިކަމުގެ ރޭޓް މަތިނަމަވެސް، ހަތިޔާރުގެ ބޭނުން މިފަދަ ގޮތްތަކަށް ބޭނުން ކުރުމަކީ ތައިލެންޑުގައި ވަރަށް މަދުން ނޫނީ ނުފެންނަ ކަމެކެވެ.

2020 ވަނަ އަހަރު ވެސް ތައިލޭންޑުގައި ގެދޮރުގެ މައްސަލައެއްގައި ރުޅިގަދަވެގެން ހުރި ސިފައިންގެ މީހަކު ވަނީ 4 ތަނަކަށް ހަމަލާދީ 29 މީހުން މަރާލައި 57 މީހުން ޒަޚަމްކޮށްލާފައެވެ.