މިޔަންމާ ބިންހެލުން: ތައިލެންޑުގެ ހުރިހާ ސްކޫލެއް ބަންދުކޮށްފި

އަވަށްޓެރި މިޔަންމާއަށް އައި ބާރުގަދަ ބިންހެލުމުގައި އެންމެ ބޮޑަށް އަސަރުކުރި ތައިލެންޑުގެ ހުރިހާ ސްކޫލެއް ބަންދުކޮށްފި އެވެ.

މިޔަންމާއަށް މިއަދު މެންދުރު އައި ބާރު ގަދަ ބިންހެލުންތަކާއި ގުޅިގެން ލިބުނު ގެއްލުންތައް ކަމާބެހޭ ފަރާތްތަކުން ދެނެގަތުމުގެ މަސައްކަތް ކުރަމުންދާ މި ދަނޑިވަޅުގައި ތައިލެންޑްގެ ހުުރިހާ ސްކޫލްތައް ބަންދުކުރަން އަންގާފައިވާކަން ހާމަކުރެއްވީ ބޮޑުވަޒީރުގެ ނައިބު އަދި ކޮމާސް މިނިސްޓަރު ފުމްތަމް ވެޗަޔަޗާއީ އެވެ.

"އެޑިއުކޭޝަން މިނިސްޓްރީން ވަނީ ހުރިހާ ސްކޫލެއް ބަންދުކުރަން އަންގާފައި، ދަރިވަރުން އެނބުރި ގެތަކަށް ދިއުމަށް އަންގާފައި،" ފުމްތަމް ވިދާޅުވި އެވެ.

ސްކޫލުތައް ބަންދުކުރަން ނިންމި އިރު ތައިލެންޑުގައި މިހާރު ވަނީ ކުއްލި ހާލަތުވެސް އިއުލާނުކޮށްފައި އެވެ.

މިޔަންމާއަށް އައި ބާރުގަދަ ބިންހެލުމުގައި ތައިލެންޑުގެ ވެރިރަށް ބެންކޮކަށް ވަރަށް ބޮޑަށް ލޮޅުން އެރި އިރު ބެންކޮކުގެ ދެ އިމާރާތެއް ވަނީ ވެއްޓިފައި އެވެ. އަދި އިމާރާތްތަކުގެ ދަށުވެ 3 މީހަކު މަރުވިކަން މިހާތަނަށް ކަށަވަރުވެފައިވާއިރު 81 މީހަކު ގެއްލިގެން ހޯދުމުގެ މަސައްކަތް ދަނީ ކުރަމުންނެވެ.

އަދި ބެންކޮކުގެ އުސް އިމާރާތްތަކުގެ ތިބި ފަރާތްތައް އެއިމާރާތްތަކުން ފޭބުމަށްވެސް އެގައުމުގެ ސަރުކާރުން ވަނީ މިހާރު އަންގާފައި އެވެ.

އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން ބުނީ ފުރަތަމަ ބިންހެލުން އައިސްފައިވަނީ ހުކުރު ދުވަހުގެ މެންދުރު 12:50 ހާއިރު މިޔަންމާގެ ސަގައިން ސިޓީގެ 16 ކިލޯމީޓަރު ހުޅަނގު އުތުރުން 10 ކިލޯމީޓަރު އަޑިން ކަމަށެވެ. އެގޮތުން ފުރަތަމަ ބިންހެލުން ރެކޯޑް ކުރެވިފައިވަނީ 7.7 މެގްނިޓިއުޑްގައި އެވެ. އަދި ދެވަނަ ލޮޅުން އައިސްފައިވަނީ އޭގެ މިނެޓެއް ފަހުން 6.4 މެގްނިޓިއުޑްގައި އެވެ.

މިޔަންމާގެ ވެރިކަން ކުރާ އަސްކަރިއްޔާއިން ވަނީ މި ބިންހެލުމާއި އެކު އެގައުމުގެ ހަ ސަރަހައްދަކާއި އެއް ސްޓޭޓެއްގައި ކުއްލި ނުރައްކަލުގެ ހާލަތު އިއުލާނުކޮށްފަ އެވެ. އަދި ދައުލަތުން ވަރަށް އަވަހަށް ހާލަތު އޮޅުން ފިލުވައި، އިންސާނީ އެހީ ފޯރުކޮށްދިނުމާއެކު ރެސްކިއު އޮޕަރޭޝަންތައް ހިންގާނެ ކަމަށްވެސް ވަނީ ބުނެފައި އެވެ. މިޔަންމާގެ ނޭޕިޑޯގެ ބޮޑު ހޮސްޕިޓަލެއް "މާސް ކެޝުއަލިޓީ އޭރިއާ" އެއްގެ ގޮތުގައި ކަނޑައަޅާފައިވާ ކަމަށް އެ ފެސިލިޓީގެ އޮފިޝަލަކު އޭއެފްޕީ ނިއުސް އެޖެންސީއަށް ވިދާޅުވި އެވެ. މި ބިންހެލުމުގައި މިޔަންމާއިން މަރުވި އަދި ޒަހަމްވި މީހުންގެ ސީދާ އަދަދެއް އަދި މިހާތަނަށް ކަށަވަރުވެފައި ނުވާއިރު މިޔަންމާގެ ސަރަހައްދަކުން ތިން މީހަކު މަރުވެފައިވާ ކަމަށް ބައެއް ރިޕޯޓުތައް ބުނެއެވެ.