ރައްޔިތުންނާއިއެކު ރައީސް ބާއްވަވާ ބައްދަލުވުންތަކުގެ ދެވަނަ ބުރު އަންނަ މަހު ފަށަނީ

ރައްޔިތުންނާއެކު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބާއްވަވާ ސިލްސިލާ ބައްދަލުވުންތައް އަލުން ފެށުމުގެ ތައްޔާރީތައް ވަމުންދާކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިހެން ވިދާޅުވީ ނޫސްވެރިންނާ ބައްދަލުކުރެއްވުމަށް ކޮންމެ ހޯމަ ދުވަހެއްގައި ބާއްވަމުންދާ ސިލްސިލާ ބައްދަލުވުމުގެ ތެރެއިން މިއަދު ބޭއްވި ބައްދަލުވުމުގެ ތެރެއިންނެވެ.

ރައީސް ވިދާޅުވީ މީގެކުރިންވެސް ރައްޔިތުންގެ އަޑުއެއްސެވުމުގެ ގޮތުން ބާއްވަމުންދިޔަ ބައްދަލުވުންތައް ޖޫން މަހުގައި އަލުން ފެށުމަށް ނިންމާފައިވާއިރު، ކުރިއެކޭ އެއްގޮތައް މާލޭގެ ވަކިވަކި އަވަށްތަކުގެ ރައްޔިތުންނާއި، ވަކިވަކި ސިނާއަތްތަކުގެ ހަރަކާތްތެރިވާ ފަރާތްތައް އަދި އަތޮޅުތަކުގެ ރަށްތަކުގެ ރައްޔިތުންނާވެސް ބައްދަލުކުރައްވާނެ ކަމަށެވެ.

މީގެއިތުރުން ރައީސް ވިދާޅުވީ އަބަދުވެސް ރައްޔިތުންނާ ގާތުން މަސައްކަތްކުރާގޮތައް މަސައްކަތްތައް ބައްޓަންކުރެވޭތޯ މަސައްކަތްކުރާ ކަމަށާއި އެއީ ރައްޔިތުން އެދޭގޮތައް، ރައްޔިތުންގެ ވިސްނުމާ އެއްގޮތައް ކަންތައްތައް ގެންދިއުމާއި، ރައްޔިތުންގެ ފަރާތުން ސީދާ ރައީސްއާ ހަމައަށް ނައިސް ހުންނަ މައްސަލަތައް ހައްލުކޮށްދިނުމުގައިވެސް ފަސޭހަތަކެއްވެގެންދާކަމެއް ކަމަށެވެ،

ސަރުކާރުގެ މަސައްކަތްތަކުގެ މައުލޫމާތު ވީހާވެސް ހާމަކަން ބޮޑުގޮތެއްގައި ރައްޔިތުންނަށް ފޯރުކޮށްދިނުމަކީ ރައީސްގެ އަމާޒެއްކަމަށް ރައީސް ފާހަގަކުރެއްވި އެވެ.