ފްރެންޗައިޒްތަކަށް ރާއްޖޭގައި ހަރަކާތްތެރިވެވޭނީ ކަނޑައެޅިފައިވާ ވަކި ޝަރުތުތަކެއްގެ މަތިން - މިނިސްޓަރ ސައީދު

ރާއްޖެއާއި ޗައިނާއާ ދެމެދު ވެފައިވާ މިނިވަން ވިޔަފާރީގެ އެއްބަސްވުމުގެ ދަށުން ޗައިނާގެ ވިޔަފާރިވެރިންނަށް ރާއްޖޭގައި ހަރަކާތްތެރިވެވޭނީ ވަކި ޝަރުތުތަކެއްގެ މަތިން ކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް މުޙައްމަދު ސައީދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، ކަނޑިތީމު ދާއިރާގެ މެމްބަރު އަމީން ފައިސަލް ވަނީ ރާއްޖެއާއި ޗައިނާއާ ދެމެދު ހެދިފައިވާ މިނިވަން ވިޔަފާރީގެ އެއްބަސްވުމުގެ ދަށުން ޗައިނާގެ ވިޔަފާރިވެރިންނަށް ރާއްޖޭގައި ރެސްޓޯރެންޓް ވިޔަފާރި ކުރުމަށް ހުޅުވާލައިފައިވޭތޯ މިނިސްޓަރ ސައީދު އާ ސުވާލުކޮށްފައެވެ.

މިނިސްޓަރ ދެއްވި ޖަވާބުގައި ވިދާޅުވީ، ޗައިނާ އާއި ދިވެހިރާއްޖެއާ ދެމެދު ހެދިފައިވާ މިނިވަން ވިޔަފާރީގެ އެއްބަސްވުމުގެ މަޝްވަރާކުރީ، ދިވެހިރާއްޖޭގެ ސިނާއަތްތަކުގެ ތަޖުރިބާކާރުންނާއި، ސަރުކާރުގެ އިދާރާތަކާއި، ހުރިހާ ފަންތިއެއްގެ ވިޔަފާރިވެރިން ޝާމިލްކޮށްގެން ކަމަށެވެ.

މިނިސްޓަރ ވިދާޅުވީ، މި އެއްބަސްވުމުގައި ސޮއިކުރީ 2017ވަނަ އަހަރު ކަމަށާއި، މި އެއްބަސްވުން ސޮއިކުރުމަށްފަހު މިނިސްޓްރީން އެކުލަވާލި ފޮރިން އިންވެސްޓްމެންޓް ޕޮލިސީތަކާއި މި އެއްބަސްވުމާ ތަފާތުތަކެއް ހުރެދާނެ ކަމަށެވެ.

މިނިސްޓަރ އިތުރަށް ވިދާޅުވީ، މިނިވަން ވިޔަފާރީގެ އެއްބަސްވުމުގެ ދަށުން ޗައިނާގެ ވިޔަފާރިވެރިންނަށްވެސް ރާއްޖޭގައި ހަރަކާތްތެރިވެވޭނީ ކަނޑައެޅިފައިވާ ވަކި ޝަރުތުތަކެއްގެ މަތިން ކަމަށެވެ.

ދިވެހިރާއްޖެއާއި ޗައިނާ ދެމެދު ސޮއިކުރެވިފައިވާ މިނިވަން ވިޔަފާރީގެ އެއްބަސްވުމަށް ޢަމަލުކުރަން ފަށާފައިވަނީ 2025 ވަނަ އަހަރު ޖަނަވަރީ މަހުގެ 1 ވަނަ ދުވަހުއެވެ.