ޕީއެސްއައިޕީގެ ދަށުން ޢިމާރާތްކުރާ 6 ކައުންސިލެއްގެ މަސައްކަތް ނިމިއްޖެ

ސަރުކާރުގެ ޕަބްލިކް ސެކްޓަރ އިންވެސްޓްމެންޓް ޕްރޮގްރާމްގެ ދަށުން ޢިމާރާތްކުރާ 6 ރަށެއްގެ ކައުންސިލު އިދާރާގެ މަސައްކަތް ނިމިފައިވާ ކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފު ޢުމަރު ވިދާޅުވެއްޖެއެވެ.

މިނިސްޓަރ މިހެން ވިދާޅުވީ ނޫސްވެރިންނާ މައުލޫމާތު ދެއްވުމަށް، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ބައްދަލުވުމުގައެވެ.

އެ މަނިކުފާނު ވިދާޅުވި ގޮތުގައި މަސައްކަތްތައް ނިމިފައިވާ ކައުންސިލު އިދާރާތަކަކީ ތ. ކިބިނދޫ، ށ. ނޫމަރާ، ލ. ކަލައިދޫ، މ. ރަތްމަންދޫ އަދި މ. ވޭވަށުގެ އިތުރުން އަދި އދ. ހަންޏާމީދޫ ކަމަށެވެ. އަދި 5 ރަށެއްގެ މަސައްކަތް މިހާރު ވެސް ހިނގަމުންދާކަމަށް މިނިސްޓަރ ފާހަގަކުރެއްވިއެވެ.

އެއީ ފ. ބިލެތްދޫ، ހއ. ހޯރަފުށީ، އދ. ދިއްދޫ އަދި ގދ. ހޯޑެއްދޫގެ އިތުރުން ހދ. ކުރިނބީއެވެ.

މީގެ އިތުރުން ކ. ދިއްފުށި ކައުންސިލް އަދި ނ. މިލަދޫ ކައުންސިލް އިމާރާތުގެ ނުނިމި ހުރި މަސައްކަތް ނިންމުމަށް ޓަކައި، މި މަސް ހުސްވުމުގެ ކުރިން އެމްޓީސީސީއާ ޙަވާލު ކުރެވޭނެ ކަމަށް މިނިސްޓަރ ވިދާޅުވިއެވެ.