އިތުރު 31 ރަށަކަށް މި މަހު އެމްބިއުލާންސް ފޮނުވަނީ!

އިތުރު 31 ރަށަކަށް މި މަހުގެ ތެރޭގައި އެމްބިއުލާންސް ފޮނުވާނެ ކަމަށް ހެލްތް މިނިސްޓަރު އަބްދު ﷲ ނާޒިމް އިބްރާހީމް ވިދާޅުވެއްޖެ އެވެ.

ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން މިނިސްޓަރު ވިދާޅުވީ ސިއްހީ މަރުކަޒުތަކާއި ހޮސްޕިޓަލްތަކުގެ ވަސީލަތްތައް ހަމަކުރުމަށް ކުރާ ގިނަ މަސައްކަތްތަކުގެ ތެރެއިން އެންމެ އިސްކަމެއް ދީގެން ކުރިއަށްގެންދާ މަސައްކަތަކީ އެމްބިއުލާންސް ހަމަކުރުމުގެ މަސައްކަަތް ކަމަށެވެ.

މި މަސައްކަތައް ބޮޑު ކުރިއެރުމެއް ލިބިފައިވާކަން ފާހަގަކުރައްވަމުން މިނިސްޓަރު ވިދާޅުވީ މިދިޔަ މަހު 56 ރަށަކަށް އެމްބިއުލާންސް ފޮނުވާފައިވާ ކަމަށެވެ. އަދި މިމަހުގެ ތެރޭގައި 2 ބުރަކަށް ބަހާލައިގެން އެމްބިއުލާންސް ރަށްރަށަށް ފޮނުވާނެ ކަމަށެވެ.

މީގެއިތުރުން މިނިސްޓަރު ވިދާޅުވީ ބޮޑެތި އާބާދީތަކަށް އަމާޒުކޮށް ޕެރަމެޑިކް އެމްބިއުލާންސްތަކެއް ހޯދަމުން އަންނަ ކަމަށެވެ. އަދި އެ އެމްބިއުލާންސްތައްވެސް އަންނަ މަހުގެ ތެރޭގައި ލިބޭނެކަމަށް މިނިސްޓަރު ވިދާޅުވި އެވެ.

"އަންނަ ހަފްތާގައި 14 ރަށަކަށް އެމްބިއުލާސް ފޮނުވާނެ. އަދި މަހުގެ ފަހުކޮޅު އަނެއް 17 ރަށަށް ފޮނުވާނެ. އަދި ސިޓީތަކަށް/ބޮޑެތި އާބާދީތަކަށް ޚާއްސަކޮށް ގެންނަ ޕެރަމެޑިކް އެމްބިއުލާންސްތަކެއް އަންނަ މަހު ލިބޭނެ." މިނިސްޓަރު ނާޒިމް ވިދާޅުވި އެވެ.

މީގެއިތުރުން ހެލްތް ސެންޓަރުތަކުގެ އުމްރާނީ ތަރައްގީ އާއި ވަސީލަތްތައް ހޯދުމުގެ 170 މަސައްކަތެއް ކުރިއަށްދާ ކަމަށް މިނިސްޓަރު ފާހަގަކުރި އެވެ.

އެގޮތުން ސިއްހީ ހިދުމަތްދޭ މަރުކަޒުތަކުގެ ވަސީލަތްތައް ހަމަކުރުމާއި ހަލާކުވެފައިވާ ވަސީލަތްތައް ހޯދުން ހިމެނޭހެން، 190 މިލިޔަން ރުފިޔާގެ ތަކެތި ހޯދުމުގެ މަސައްކަތް އެސްޓީއޯ އާއި ގުޅިގެން ސަރުކާރުން ކުރިއަށްގެންދާ ކަމަށް މިނިސްޓަރު ވިދާޅުވި އެވެ.

ހަމައެއާއެކު މަރާމާތު ކުރުމުގެ ހިދުމަތް ބައެއް ރަށްރަށުން ނުލިބޭތީ، އެމްބިއުލާންސްތަކަށް ދިމާވާ މައްސަލަ އަވަހަށް ހައްލުކުރުމަށްޓަކައި މަރާމާތުގެ މަސައްކަތްވެސް ދިގު މުއްދަތަކަށް ބަޔަކާ ހަވާލުކުރުމުގެ މަސައްކަތްވެސް ކުރަމުންދާ ކަމަށް މިނިސްޓަރު ފާހަގަކުރެއްވި އެވެ.