ފައިސާ ނެގުމަށްފަހު އުމްރާ ދަތުރު ކެންސަލްކުރި ގްރޫޕުގެ 28 މީހަކަށް ހައްޖު ކޯޕަރޭޝަނުން ޖާގަ ދީފި

އަމިއްލަ ޢުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު އުމްރާއަށް ގެންގޮސްފައިނުވާތީ އޭގެތެރެއިން 28 މީހަކަށް ހައްޖު ކޯޕަރޭޝަނުން ޖާގަ ދީފި އެވެ.

އަމިއްލަ ޢުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު އުމްރާއަށް ގެންގޮސްފައިނުވާ މައްސަލައެއް ވަނީ ފެންމަތިވެފައެވެ. މައުލޫމާތު ލިބިފައިވާގޮތުގައި 'އަލް އަބްރާރު ޕްރައިވެޓް ލިމިޓެޑް' ނަމަކަށް ކިޔާ މި ގުރޫޕުން ރަމަޟާން މަހުގެ ފަހު 15 ގައި އުމްރާއަށް ދިޔުމަށް 110 މީހުން ފައިސާ ދައްކާފައިވެއެވެ.

ޙައްޖު ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ޝަކީލް ވިދާޅުވީ މިއަހަރުގެ ރަމަޟާން މަހު ޢުމްރާގެ އަޅުކަމަށް ގެންދާނެ ކަމަށް ބުނެ އަމިއްލަ ޢުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު ޢުމްރާގެ އިންތިޒާމުތައް ހަމަޖައްސާފައި ނުވާތީ އިއްޔެ ހަވީރުގެ ވަގުތެއްގައި އޭގެ ތެރެއިން ގިނަ ބަޔަކު އެ ކޯޕަރޭޝަންގެ ހަވާލުގައި އުމްރާއަށް ދިއުމަށް އެދިފައިވާކަމަށެވެ.

އެ ކޯޕަރޭޝަންގައި ޖާގަ އޮތް މިންވަރުން 28 މީހުންނަށް ވިސާ ޖަހައި މައްކާ އާއި މަދީނާއިން އެކޮމޮޑޭޝަނާއި ކެއިންބުއިމާއި ދަތުރުފަތުރުގެ އެންމެހާ އިންތިޒާމުތައް ހަމަޖައްސާފައިވާކަމަށާއި، އެ 28 މީހުން މިއަދު ހެނދުނު މޯލްޑިވިއަންގެ ފްލައިޓަކުން ސައުދީ ޢަރަބިއްޔާއަށްފުރާފައިވާ ކަމަށް ޝަކީލް ވިދާޅުވިއެވެ.

މީގެ އިތުރުން ޓްރެވެލަރ ގްރޫޕުގެ ފަރާތުން ވެސް ވަނީ މީގެތެރެއިން 21 މީހަކަށް ޖާގަދީފައެވެ. އެ ގްރޫޕުގެ ފަރާތުން ބުނީ، ޖާގަ ބޭނުންވެގެން ރޭ ދަންވަރުގެ ވަގުތެއްގައި ބަޔަކު އެދުނު ކަމަށާއި، ވަގުތުން ވަގުތަށް 21 މީހަކަށް ވިސާ ޖަހައިދީ ރޭ ފަތިހުގެ ވަގުތެއްގައި ވަނީ ސައުދީއަށް ފުރާފައެވެ.