ފައިސާ ނެގުމަށްފަހު އުމްރާއަށް ނުގެންދިޔަ 21 މީހުންނަށް ޓްރެވެލާ ގްރޫޕުން ޖާގަ ދީފި

އަމިއްލަ ޢުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު އުމްރާއަށް ގެންގޮސްފައިނުވާތީ އޭގެތެރެއިން 21 މީހަކަށް ޓްރެވެލަރ ގްރޫޕުގެ ހަވާލުގައި އުމްރާއަށް ފޮނުވައިފި އެވެ.

އަމިއްލަ ޢުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު އުމްރާއަށް ގެންގޮސްފައިނުވާ މައްސަލައެއް ވަނީ ފެންމަތިވެފައެވެ. މައުލޫމާތު ލިބިފައިވާގޮތުގައި 'އަލް އަބްރާރު ޕްރައިވެޓް ލިމިޓެޑް' ނަމަކަށް ކިޔާ މި ގުރޫޕުން ރަމަޟާން މަހުގެ ފަހު 15 ގައި އުމްރާއަށް ދިޔުމަށް 110 މީހުން ފައިސާ ދައްކާފައިވެއެވެ.

ދަ ޓްރެވެލަރ އުމްރާ ގްރޫޕުގެ އޮފިޝަލަކު ވިދާޅުވީ، މައްސަލަ ޖެހިގެން ނުފުރި އުޅުނު އުމްރާވެރިންގެ ތެރެއިން 21 މީހުން ޓްރެވެލަރ ގްރޫޕުގެ ހަވާލުގައި ރޭ ފަތިހު ފުރާފައިވާ ކަމަށެވެ.

ރޭ ދަންވަރުގެ ވަގުތެއްގައި އުމްރާއަށް ދެވޭނެ ގޮތެއް ނެތިގެން ބަޔަކުން ގުޅުއްވުމުން، ވަގުތުން ވިސާ ހަމަޖައްސައި ފަތިހު ޗާޓަރު ފްލައިޓެއްގައި ޓްރެވެލަރ ޓީމާއެކު 21 މީހުން އުމްރާއަށް ފުރުވާލާފައިވާ ކަމަށް ޓްރެވެލަރ އިން ވަނީ ބުނެފައެވެ. އަދި އުމްރާގެ އަޅުކަން ފުރިހަމަކުރުމަށްފަހު 26 މާރޗް ގައި އެބޭފުޅުން ރާއްޖެ ވަޑައިގަންނަވާނެ ކަމަށް ޓްރެވެލަރ ގެ އޮފިޝަލް ވިދާޅުވި އެވެ.

މީގެ އިތުރުން ހައްޖު ކޯޕަރޭޝަނުންވެސް ވަނީ ޖާގަ އޮތް މިންވަރަކުން އޭގެތެރެއިން 28 މީހަކަށް ވަގުތުން ވިސާ ހަމަޖައްސައި މިއަދު ފުރުވާލާފައެވެ.