އިރާނާއި 650 ކިލޯމީޓަރު ދުރުން އިންޑިއާ ކަނޑުގައި އޮތް އެމެރިކާގެ މަނަވަރަކަށް އިރާނުން ހަމަލާދީފި

އިރާނުގެ އައްސޭރިފަށާއި 650 ކިލޯމީޓަރު ދުރުން އިންޑިއާ ކަނޑުގައި އޮތް އެމެރިކާގެ އަސްކަރީ މަނަވަރަކަށް އިރާނުން ހަމަލާދީފި އެވެ.

މިކަން ހާމަކޮށް އިރާނުގެ ރިވޮލިއުޝަނަރީ ގާޑްސްއިން ދާދި ދެންމެ އަކު ބުނީ އިރާނާއި 650 ކިލޯމީޓަރު ދުރުން އިންޑިއާ ކަނޑުގައި އޮތް އެމެރިކާގެ މަނަވަރަކަށް މިސައިލް ހަމަލާއެއް ދީފައިވާ ކަމަށެވެ.

އެގޮތުން މި ހަމަލާ ދީފައިވަނީ އެމެރިކާގެ ޓޭންކަރަކުން އެ މަނަވަރަށް ތެޔޮ އަޅަމުން ދަނިކޮށް ކަމަށްވެސް އައިއާރްޖީސީން ވަނީ ބުނެފައި އެވެ.

ނަމަވެސް އަދި މިހާތަނަށް މިކަމާއި ގުޅިގެން ރަސްމީކޮށް އެމެރިކާއިން ބަހެއް ބުނެފައި ނުވެއެވެ.

ރިޕޯޓުތައް ބުނާގޮތުގައި މިވަގުތުވެސް އިންޑިއާ ކަނޑާއި އަރަބި ކަނޑު ގުޅޭ ސަރަހައްދުގައި އެމެރިކާ ނޭވީގެ އަސްކަރީ ފްލީޓެއް ދަނީ ހަރަކާތްތެރިވަމުންނެވެ. އޭގެ ތެރޭގައި އެމެރިކާގެ އެންމެ ބޮޑު އެއާކްރާފްޓް ކެރިޔަރ ޔޫއެސްއެސް އެސްއެސް އަބްރަހަމް ލިންކަންވެސް ހިމެނެއެވެ.

މިދިޔަ ހޮނިހިރު ދުވަހުގެ ހެނދުނު އެމެރިކާ އިސްވެ އޮވެ އިސްރާއީލާއި ގުޅިގެން އިރާނަށް ވަރުގަދަ ހަމަލާތަކެއް ވަނީ ދޭން ފަށާފައި އެވެ. މި ހަމަލާތަކުގައި އިރާނުގެ ސުޕްރީމް ލީޑަރު އާޔަތުالله އަލީ ޚާމަނާއީވެސް އަވަހާރަކޮށްލާފައިވެއެވެ. މިއާއިއެކު އިރާނުން ވަނީ ބަދަލުހިފުމުގެ ވަރުގަދަ ހަމަލަތާކެއް އިސްރާއީލާއި މެދުއިރުމަތީގައި އެމެރިކާގެ އަސްކަރީ މަރުކަޒުތައް ހުރި ގައުމުތަކަށް ދީފައި އެވެ. އެގޮތުން އެންމެ ވަރުގަދަ ހަމަލާތަކެއް އިރާނުން ދީފައިވަނީ ގަތަރާއި ކުވެއިތު އަދި ޔޫއޭއީއަށެވެ.

މެދުއިރުމަތީގެ ގިނަ ގައުމުތަކަކީ އެމެރިކާގެ އަސްކަރީ ބޭސްތައް ހުންނަ ގައުމުތަކެވެ. އިރާނުން ވަނީ ދެމުން އަންނަ ހަމަލާތަކަކީ އެގައުމުތަކުގެ ވެރިންނަށާއި ރައްޔިތުންނަށް ދެމުން އަންނަ ހަމަލާތަކެއް ނޫން ކަމަށާއި އެއީ އެމެރިކާގެ ބާރު ހިނގާ ތަންތަނަށް ދެމުން އަންނަ ހަމަލާތަކެއް ކަމަށް ބުނެ އެކަން އެގައުމުތަކަށްވެސް ރަސްމީކޮށް އަންގާފައި އެވެ.