ރާއްޖޭއަށް ތެލުގެ އެއްވެސް ދަތިކަމެއް ނެތް- މިނިސްޓަރު

ޖަޒްލާ މުހައްމަދު

3/3/2026, 6:48:07 AM

# މުހައްމަދު ސައީދު # ރައީސް އޮފީސް # ރާއްޖޭގެ އިގްތިސާދު

މިނިސްޓަރު ސައީދު މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން- ފޮޓޯ: ރައީސް އޮފީސް

މިހާރު ހިނގަމުންދާ މެދުއިރުމަތީގެ ހަމަނުޖެހުންތަކާ ގުޅިގެން ރާއްޖޭގެ ތެލުގެ ސްޓޮކްއަށް އެއްވެސް ދަތިކަމެއް ނާންނާނެކަމަށް އިގްތިސޯދީ މިނިސްޓަރު މުހައްމަދު ސައީދު ވިދާޅުވެއްޖެ އެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން މިނިސްޓަރު ވިދާޅުވީ ތެލުގެ އަގުތަކަށް ބަދަލުއައި ނަމަވެސް ރާއްޖޭގެ ތެލުގެ ސްޓޮކްގައި އެއްވެސް މައްސަލައެއް ނެތްކަމަށެވެ.

ބައިނަލްއަގްވާމީ މާކެޓުތަކުގައި އިއްޔެ ތެލުގެ އަގުތަކަށް ނިސްބަތްކޮށް މިނިސްޓަރު ވިދާޅުވީ 25% އާއި 30% އަށް އަގުތައް އުފުލިފައިވާ ކަމަށެވެ. އަދި މިހާރުގެ ހާލަތުގެ ސަބަބުން ތަކެތީގެ އަގަށް ބަދަލުތައް އަންނަމުންދިޔަ ނަމަވެސް ރާއްޖެއިން ފިޔަވަޅުތައް އަޅަމުންދަނީ އެކަންކަމަށް ވިސްނައިގެން ކަމަށް މިނިސްޓަރު ފާހަގަކުރެއްވި އެވެ.

"އިއްޔެ ރައީސް ފާހަގަކުރެއްވި ގޮތަށް އަޅުގަނޑުމެންނަށް އަދި އެއްވެސް ކަންބޮޑުވުމެއް ނެތް ކުރުކޮށް ދަންނަވާ ނަމަ ތެލަކަށް ނުޖެހޭނެ، އިރާދަކުރެއްވިއްޔާ. އެލްޕީޖީ ވެސް އަދި ތެޔޮ ވެސް ހިމަނައިގެން މި ދެންނެވީ." މިނިސްޓަރު ވިދާޅުވި އެވެ.

މީގެއިތުރުން މިނިސްޓަރު ވިދާޅުވީ ރާއްޖެ އަންނަ ފަތުރުވެރިންނާއި ރާއްޖޭގައި މަސައްކަތް ކުރާ އާބާދީ އިތުރުވަމުންދާތީ އެ ހުރިހާ އެންމެންނަށް ކޭޓާ ކުރެވޭ ވަރަށް ތެލާއި ކާބޯތަކެތީގެ ރައްކާތެރިކަން ކަށަވަރު ކުރުމުގެ މަސައްކަތް ކުރާމުންދާ ކަމަށެވެ. އަދި މި މުދާތައް ގެނައުމުގެ އިތުރު ރޫޓުތައްވެސް ބަލަމުންދާ ކަމަށް މިނިސްޓަރު ފާހަގަކުރެއްވި އެވެ.