އިރާނުގެ ދައުލަތުގެ މީޑިއާ، އައިއާރްއައިބީގެ މައި މަރުކަޒަށް ޔަހޫދީން ބޮން އަޅައިފި

އިރާނުގެ ދައުލަތުގެ މީޑިއާ ކަމަށްވާ އިސްލާމިކް ރިޕަބްލިކް އޮފް އިރާން ބްރޯޑްކާސްޓިންގ، އައިއާރްއައިބީގެ މައި މަރުކަޒަށް ނިރުބަވެރި އިސްރާއީލުން ބޮން އަޅައިފި އެވެ.

އިރާނުގެ މީޑިއާތަކުން ރިޕޯޓުކުރާ ގޮތުގައި އައިއާރްއައިބީގެ މައި މަރުކަޒަށް އަމާޒުކޮށް އިސްރާއީލުން މިރޭ ދިން ހަމަލާއާއި ގުޅިގެން މުޅި ތެހެރާނަށް ލޮޅުންތަކެއް ވަނީ އައިސްފައި އެވެ. އެގޮތުން މި ހަމަލާގައި ސީދާ އިމާރާތް ލިބުނު ގެއްލުންތައް އަދި ހާމަވެފައިނުވި ނަމަވެސް ބާރުގަދަ ދެ ގޮވުމެއްގެ އަޑު އިވިފައިވާ ކަމަށް ރިޕޯޓުތައް ބުނެއެވެ.

އިރާނުގެ މިޑިއާތަކުން މިފަދައިން ރިޕޯޓުކުރުމުގެ އިރުކޮޅެއް ކުރިން އިސްރާއީލުގެ އަސްކަރިއްޔާއިން ވަނީ ތެހެރާނަށް އިތުރު ވަރުގަދަ ހަމަލާތަކެއް ފޮނުވާލާފައިވާކަން ހާމަކޮށްފައެވެ. ނަމަވެސް ހަމަލާތައް އަމާޒުކުރި ސީދާ ތަންތަން ޔަހޫދީން އާންމު ނުކުރެއެވެ.

ހަމަލާތައް ފޮނުވާލުމަށްފަހު އިސްރާއީލުން ވަނީ އައިއާރްބީ ހުންނަ ސަރަހައްދު ހިމެނޭހެން ވެރިރަށް ތެހެރާނުގެ ގިނަ އަވަށްތަކެއް ހުސްކުރަން އަންގާފައި އެވެ. ނަމަވެސް އިސްރާއީލުން އަބަދުވެސް އިރާނުގެ އަވަށްތައް ހުސްކުރަން އަންގަނީ ހަމަލާ ވާސިލުވާން ކުޑަ ވަގުތުކޮޅަކަށް ވުމުންނެވެ.

އިސްލާމިކް ރިޕަބްލިކް އޮފް އިރާން ބްރޯޑްކާސްޓިންގ، އައިއާރްއައިބީ އަކީ އިރާނު ސަރުކާރުގެ ފުރިހަމަ ކޮންޓްރޯލް އޮންނަ އެގައުމުގެ ގައުމީ ބްރޯޑްކާސްޓަރެވެ.