އެމެރިކާގެ ޖެޓުތަކަށް ހަމަލާދިނީ ކުވެއިތުގެ އަސްކަރިއްޔާއިން: ބުނީ "އޮޅުމަކުން" ކަމަށް!

ކުވައިތުގެ ވައިގެ ސަރަހައްދުގައި ހަރަކާތްތެރިވަމިކޮށް ވެއްޓުނު އެމެރިކާގެ ތިން އަސްކަރީ ޖެޓަށް ހަމަލާދެވުނީ އޮޅުމަކުން ކަމަށް ކުވެއިތުގެ އަސްކަރިއްޔާއިން ބުނެފި އެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނީ ގޮތުގައި އާދީއްތަ ދުވަހު އެމެރިކާ އަސްކަރިއްޔާގެ ތިން އެފް-15އީ ސްޓްރައިކް އީގަލް ކުވެއިތުގެ ވައިގެ ސަރަހައްދުގައި ހަރަކާތްތެރިވަމުން ދަނިކޮށް އަމާޒުވި ހަމަލާތަކެއްގައި ވެއްޓިފައިވާ ކަމަށެވެ. އެގޮތުން މި ހަމަލާތަކަކީ ކުވައިތުގެ އަސްކަރިއްޔާއިން އިރާނުން ދެމުންދިޔަ ހަމަލާތައް ހުއްޓުވުމަށް ކުރި މަސައްކަތުގެ ތެރެއިން އޮޅުމަކުން އެމެރިކާގެ ޖެޓުތަކަށް ދެވުނު ހަމަލާތަކެއް ކަމަށްވެސް ސެންޓްކޮމްއިން ބުނެއެވެ.

އަދި މިކަން ކުވައިތު އަސްކަރިއްޔާއިން ގަބޫލުކޮށް މާފަށް އެދިފައިވާ ކަމަށާއި މި ހާދިސާގައި ވެއްޓުނު ތިން ބޯޓުގެ ހަ ކްރޫއިންގެ ހާލުވެސް ރަނގަޅު ކަމަށް ސެންޓްކޮމްއިން ވަނީ ބުނެފައި އެވެ.

"މިހާރު ހިނގަމުންދާ މި އޮޕަރޭޝަންގައި ކުވައިތުގެ ދިފާއީ ބާރުތަކުން ކުރާ މަސައްކަތާއި ދޭ އެހީތެރިކަމަށް ޝުކުރުވެރިވަން،" އެކްސްގައި ސެންޓްކޮމްއިން ޝާއިއުކުރި ބަޔާނުގައިވެ އެވެ.

އަލްޖަޒީރާއިންއިން ވެސް ވަނީ ކުވައިތުގެ ހުޅަނގުން 32 ކިލޯމީޓަރު (19 މޭލު) ދުރުގައި އޮންނަ އަލްޖަހުރާ ސިޓީއަށް އެމެރިކާގެ އެފް 15 ޖެޓެއް ވެއްޓޭ މަންޒަރު ފެންނަ ވީޑިއޯއިން ލިބިފައިވާ ކަން ހާމަކޮށްފައެވެ. އެގޮތުން އެވީޑިއޯގެ ސައްހަކަންވެސް ކަށަވަރުކުރެވިފައިވާ ކަމަށް އަލްޖަޒީރާއިން ބުނެއެވެ.

އިރާނަކީ ނިއުކްލިއާ ހަތިޔާރު އުފައްދަމުންދާ ގައުމެއް ކަމަށާއި އެބިރު މުޅި ދުނިޔެއަށް އޮތް ކަމަށް ބުނެ އިސްރާއީލާއި އެމެރިކާއިން ދުނިޔޭގެ ގާނޫނު ތަކާއި ހިލާފަށް އިރާނަށް ވަރުގަދަ ހަމަލާތަކެއް ދޭން ފެށީ ހޮނިހިރު ދުވަހު ހެނދުނު އެވެ. އެގޮތުން މި ހަމަލާތަކުގައި އިރާނުގެ އިސް ލީޑަރު ޚާމަނާއީ އާއި އިރާނުގެ އަސްކަރީ ގިނަ ވެރިންތަކެއް އަވަހާރަކޮށްލާފައިވާއިރު މިކަން އިރާނުންވެސް އިއްޔެ ވަނީ ރަސްމީކޮށް އިއުލާނުކޮށްފައެވެ.

އެމެރިކާއާއި އިސްރާއީލުގެ މި އަމަލުގެ ސަބަބުން އިރާނުން ވަނީ އިސް ލީޑަރާއި އަސްކަރީ ކޮމާންޑަރުންގެ މަރުގެ ބަދަލު ހިފާނެކަން އިއުލާނުކޮށް އިސްރާއީލުގެ ގިނަ ސަރަހައްދުތަކަކަށާއި މެދުއިރުމަތީގައި ގާއިމުވެ ތިބި އެމެރިކާ ސިފައިންގެ މަރުކަޒުތަކަށް އަމާޒުކޮށް ހުއްޓުމެއް ނެތް ހަމަލާތަކެއް ދެމުންނެވެ. މި ހަމަލާތަކުގައި މަރުކަޒުތަކަށް ގެއްލުން ނުވާކަމަށް އެމެރިކާއިން މިރެއާއި ހަމައަށްވެސް ބުނަމުން އައި ނަމަވެސް އިތުބާރުހުރި މަސްދަރުތަކުން އަންނަނީ އެމެރިކާގެ މަރުކަޒުތަކަށް އެމެރިކާއިން ހީވެސްނުކުރާ ފަދަ ގެއްލުންތަކެއް ވަމުންދާކަން ހާމަކޮށްފައެވެ.

މިގޮތުން އެމެރިކާގެ އެންމެ ބޮޑެތި އަސްކަރީ މަރުކަޒުތައް ހުރި ޔޫއޭއީއާއި ގަތަރާއި ކުވެއިތު އަދި ބަހްރައިނަށް ވަރުގަދަ ހަމަލާތަކެއް ދީ އެގައުމުތަކުގެ އާންމު ދިރިއުޅުންވެސް ވަނީ ހުއްޓުމަކަށް އައިސްފައި އެވެ.

އިރާނުގެ ހަމަލާތަކުގައި މިހާތަނަށް އެމެރިކާގެ 3 ސިފައިން މަރުވެފައިވާކަމަށް ވެސް ރިޕޯޓުތައް ބުނެއެވެ.