ހިޒްބުاللهގެ ލީޑަރު ނާއިމް ޤާސިމް އަވަހާރަކޮށްލަން އިސްރާއީލުން ލުބުނާނަށް ވަރުގަދަ ހަމަލާތަކެއް ދެނީ

އިސްރާއީލުން ލުބުނާނަށް ވަރުގަދަ ހަމަލާތަކެއް ދެމުންދަނީ ހިޒްބުاللهގެ ލީޑަރު ނާއިމް ޤާސިމް އަވަހާރަކޮށްލަން ކަމަށް ރިޕޯޓުތައް ބުނެފި އެވެ.

މެދުއިރުމަތީގައި މިހާރު ހިނގަމުން އަންނަ ހަނގުރާމައިގެ ތެރެއިން އިސްރާއީލުން އީރާނުގެ ރޫހާނީ ލީޑަރު، އާޔަތުﷲ އަލީ ޚާމަނާއީ އަވަހާރަކޮށްލުމާއި ގުޅިގެން، ލުބުނާނުގައި ހަރަކާތްތެރިވާ ހިޒްބުﷲ ޖަމާއަތުން އީރާނާއި ގުޅިގެން އިސްރާއީލަށް ވަރުގަދަ ހަމަލާތަކެއް ރޭ ވަނީ ދީފައި އެވެ. މިއާއިއެކު އިސްރާއީލުން މިހާރު ވަނީ ލުބުނާނަށް ވަރުގަދަ ހަމަލާތަކެއް ދޭން ފަށާފައި އެވެ.

ހާއްސަގޮތެއްގައި މި ހަމަލާތައް އަމާޒުކޮށްފައިވަނީ އެގައުމުގެ ވެރިރަށް، ބެއިރޫތާއި ދެކުނުން ހިޒްބުﷲ ޖަމާއަތުގެ މެމްބަރުން ތިބޭ ސަރަހައްދުތަކަށެވެ.

⁠އިސްރާއީލުގެ ޑިފެންސް މިނިސްޓަރު ވެސް ވަނީ ހިޒްބުاللهގެ ސެކްރެޓަރީ ޖެނެރަލް ނާއިމް ޤާސިމަކީ މިހާރު “އެލިމިނޭޝަންގެ އަމާޒެއް” ކަމުގައި އިއުލާނުކޮށްފަ އެވެ.

މިއަދު ހެނދުނުން ފެށިގެން އިސްރާއިލުން ލުބުނާނަށް ދެމުންދާ ހަމަލާތަކުގައި މިހާތަނަށް 30 އަށްވުރެ ގިނަ މީހުން ލުބުނާނުން ޝަހީދުކޮށްލާފައިވާއިރު އޭގެ ތެރޭގައި ހިޒްބުالله ގެ އިސްވެރިންތަކެއްވެސް ހިމެނޭ ކަމަށް ރިޕޯޓުތަށް ބުނެއެވެ.

ޤާސިމް ހިޒްބުالله ގެ ލީޑަރޝިޕާއި ހަވާލުވެވަޑައިގެންނެވީ މިދިޔަ އަހަރުގެ ސެޕްޓެމްބަރު މަހުގެ 27 ވަނަ ދުވަހު އިސްރާއީލުން ހިޒްބުاللهގެ އިސްވެރިޔާ ހަސަން ނަސްރުالله އަވަހާރަކޮށްލުމާއިގުޅިގެންނެވެ.