އިސްރާއީލާއި އެމެރިކާއިން އިރާނަށް ދެމުންދާ ހަމަލާތައް: ތެހެރާނުން ޗައިނާ ރައްޔިތަކު މަރުވެއްޖެ

އިސްރާއީލާއި އެމެރިކާއިން ހުއްޓުމެއްނެތި އިރާނަށް މިހާރު ދެމުން ގެންދާ ހަމަލާތަކުގައި އިރާނުގެ ވެރިރަށް ތެހެރާނުން ޗައިނާ ރައްޔިތަކު މަރުވެއްޖެ އެވެ.

ޗައިނާގެ ފޮރިން މިނިސްޓްރީގެ ތަރުޖަމާނު މައޯ ނިންގް ވިދާޅުވީ މެދުއިރުމަތީގައި ހިނގަމުންދާ ހަނގުރާމާގައި އިރާނަށް ދެމުންދާ ހަމަލާތަކުގައި ވެރިރަށް ތެހެރާނުން މިހާތަނަށް ޗައިނާގެ އެއް ރައްޔިތަކު މަރުވެފައިވާ ކަމަށެވެ.

އިރާނަކީ ނިއުކްލިއާ ހަތިޔާރު އުފައްދަމުންދާ ގައުމެއް ކަމަށާއި އެބިރު މުޅި ދުނިޔެއަށް އޮތް ކަމަށް ބުނެ އިސްރާއީލާއި އެމެރިކާއިން ދުނިޔޭގެ ގާނޫނު ތަކާއި ހިލާފަށް އިރާނަށް ވަރުގަދަ ހަމަލާތަކެއް ދޭން ފެށީ ހޮނިހިރު ދުވަހު ހެނދުނު އެވެ. އެގޮތުން މި ހަމަލާތަކުގައި އިރާނުގެ އިސް ލީޑަރު ޚާމަނާއީ އާއި އިރާނުގެ އަސްކަރީ ގިނަ ވެރިންތަކެއް އަވަހާރަކޮށްލާފައިވާއިރު މިކަން އިރާނުންވެސް އިއްޔެ ވަނީ ރަސްމީކޮށް އިއުލާނުކޮށްފައެވެ. އަދި އިރާނުން 500 އަށްވުރެ ގިނަ މީހުންވެސް ވަނީ މި ހަމަލާތަކުގައި ޝަހީދުވެފައި އެވެ.

އެމެރިކާއާއި އިސްރާއީލުގެ މި އަމަލުގެ ސަބަބުން އިރާނުން ވަނީ އިސް ލީޑަރާއި އަސްކަރީ ކޮމާންޑަރުންގެ މަރުގެ ބަދަލު ހިފާނެކަން އިއުލާނުކޮށް އިސްރާއީލުގެ ގިނަ ސަރަހައްދުތަކަކަށާއި މެދުއިރުމަތީގައި ގާއިމުވެ ތިބި އެމެރިކާ ސިފައިންގެ މަރުކަޒުތަކަށް އަމާޒުކޮށް ހުއްޓުމެއް ނެތް ހަމަލާތަކެއް ދެމުންނެވެ. މި ހަމަލާތަކުގައި މަރުކަޒުތަކަށް ގެއްލުން ނުވާކަމަށް އެމެރިކާއިން މިރެއާއި ހަމައަށްވެސް ބުނަމުން އައި ނަމަވެސް އިތުބާރުހުރި މަސްދަރުތަކުން އަންނަނީ އެމެރިކާގެ މަރުކަޒުތަކަށް އެމެރިކާއިން ހީވެސްނުކުރާ ފަދަ ގެއްލުންތަކެއް ވަމުންދާކަން ހާމަކޮށްފައެވެ.

މިގޮތުން އެމެރިކާގެ އެންމެ ބޮޑެތި އަސްކަރީ މަރުކަޒުތައް ހުރި ޔޫއޭއީއާއި ގަތަރާއި ކުވެއިތު އަދި ބަހްރައިނަށް ވަރުގަދަ ހަމަލާތަކެއް ދީ އެގައުމުތަކުގެ އާންމު ދިރިއުޅުންވެސް ވަނީ ހުއްޓުމަކަށް އައިސްފައި އެވެ.

އިރާނުގެ ހަމަލާތަކުގައި މިހާތަނަށް އެމެރިކާގެ 3 ސިފައިން މަރުވެފައިވާކަމަށް ވެސް ރިޕޯޓުތައް ބުނެއެވެ.