އިރާނަށް ހަމާލާދޭން ބޭނުންކުރަމުންދިޔަ އެމެރިކާގެ ޖެޓެއް ކުވެއިތުގެ ސަރަހައްދަކަށް ވެއްޓިއްޖެ

އިރާނުން ކުވެއިތަށް ދިން ހަމަލާއެއްގައި އެމެރިކާގެ ޖެޓެއް ވެއްޓިފައިވާކަމަށް ރިޕޯޓުތައް ބުނަން ފަށައިފި އެވެ.

ރިޕޯޓުތައް ބުނާގޮތުގައި ކުވެއިތަށް ވެއްޓުނީ އެމެރިކާގެ އެފް15 މަރުކާގެ ޖެޓެކެވެ. މި ޖެޓަކީ ކުވެއިތުގައި ހުންނަ އެމެރިކާގެ އަސްކަރީ މަރުކަޒެއްގައި ބޭނުންކުރަމުން އަންނަ ޖެޓެއް ކަމަށް އެމެރިކާގެ އިސް އޮފިޝަލުން ތަކަކާއި ހަވާލާދީ އިތުބާރުހުރި ރިޕޯޓުތައް ބުނެއެވެ.

އިރާނުގެ ބައެއް މީޑިއާތަކުން ރިޕޯޓުކުރާ ގޮތުގައި ކުވެއިތަށް ވެއްޓުނު އެމެރިކާގެ ޖެޓު ވެއްޓެން ދިމާވީ އިރާނުން ދިން ހަމަލާއެއްގައި އެވެ. އެގޮތުން ކުވެއިތުގައި ހުންނަ އެމެރިކާގެ އަސްކަރީ ބޭސްއިން ފުރައިގެން އެ ޖެޓު އިރާނުގެ ވައިގެ ސަރަހައްދަށް ވަދެ އިރާނަށް ވަރުގަދަ ހަމަލާތަކެއް މިއަދުވެސް ދީފައިވާ ކަމަށް އިރާނުގެ މިޑިއާތަކުން ބުނެއެވެ.

އަލްޖަޒީރާއިންއިން ވެސް ވަނީ ކުވައިތުގެ ހުޅަނގުން 32 ކިލޯމީޓަރު (19 މޭލު) ދުރުގައި އޮންނަ އަލްޖަހުރާ ސިޓީއަށް އެމެރިކާގެ އެފް 15 ޖެޓެއް ވެއްޓޭ މަންޒަރު ފެންނަ ވީޑިއޯއިން ލިބިފައިވާ ކަން ހާމަކޮށްފައެވެ. އެގޮތުން އެވީޑިއޯގެ ސައްހަކަންވެސް ކަށަވަރުކުރެވިފައިވާ ކަމަށް އަލްޖަޒީރާއިން ބުނެއެވެ.

މިކަމާއި ގުޅިގެން އަދި މިހާތަނަށް އެމެރިކާއިން ރަސްމީކޮށް ބަހެއް ބުނެފައިނުވެއެވެ.

އިރާނަކީ ނިއުކްލިއާ ހަތިޔާރު އުފައްދަމުންދާ ގައުމެއް ކަމަށާއި އެބިރު މުޅި ދުނިޔެއަށް އޮތް ކަމަށް ބުނެ އިސްރާއީލާއި އެމެރިކާއިން ދުނިޔޭގެ ގާނޫނު ތަކާއި ހިލާފަށް އިރާނަށް ވަރުގަދަ ހަމަލާތަކެއް ދޭން ފެށީ ހޮނިހިރު ދުވަހު ހެނދުނު އެވެ. އެގޮތުން މި ހަމަލާތަކުގައި އިރާނުގެ އިސް ލީޑަރު ޚާމަނާއީ އާއި އިރާނުގެ އަސްކަރީ ގިނަ ވެރިންތަކެއް އަވަހާރަކޮށްލާފައިވާއިރު މިކަން އިރާނުންވެސް އިއްޔެ ވަނީ ރަސްމީކޮށް އިއުލާނުކޮށްފައެވެ.

އެމެރިކާއާއި އިސްރާއީލުގެ މި އަމަލުގެ ސަބަބުން އިރާނުން ވަނީ އިސް ލީޑަރާއި އަސްކަރީ ކޮމާންޑަރުންގެ މަރުގެ ބަދަލު ހިފާނެކަން އިއުލާނުކޮށް އިސްރާއީލުގެ ގިނަ ސަރަހައްދުތަކަކަށާއި މެދުއިރުމަތީގައި ގާއިމުވެ ތިބި އެމެރިކާ ސިފައިންގެ މަރުކަޒުތަކަށް އަމާޒުކޮށް ހުއްޓުމެއް ނެތް ހަމަލާތަކެއް ދެމުންނެވެ. މި ހަމަލާތަކުގައި މަރުކަޒުތަކަށް ގެއްލުން ނުވާކަމަށް އެމެރިކާއިން މިރެއާއި ހަމައަށްވެސް ބުނަމުން އައި ނަމަވެސް އިތުބާރުހުރި މަސްދަރުތަކުން އަންނަނީ އެމެރިކާގެ މަރުކަޒުތަކަށް އެމެރިކާއިން ހީވެސްނުކުރާ ފަދަ ގެއްލުންތަކެއް ވަމުންދާކަން ހާމަކޮށްފައެވެ.

މިގޮތުން އެމެރިކާގެ އެންމެ ބޮޑެތި އަސްކަރީ މަރުކަޒުތައް ހުރި ޔޫއޭއީއާއި ގަތަރާއި ކުވެއިތު އަދި ބަހްރައިނަށް ވަރުގަދަ ހަމަލާތަކެއް ދީ އެގައުމުތަކުގެ އާންމު ދިރިއުޅުންވެސް ވަނީ ހުއްޓުމަކަށް އައިސްފައި އެވެ.

އިރާނުގެ ހަމަލާތަކުގައި މިހާތަނަށް އެމެރިކާގެ 3 ސިފައިން މަރުވެފައިވާކަމަށް ވެސް ރިޕޯޓުތައް ބުނެއެވެ.