މެދުއިރުމަތީގެ ހަނގުރާމަ: ރައީސުލްޖުމްހޫރިއްޔާ، ޔޫއޭއީގެ ރައީސަށް ފޯނުން ގުޅުއްވައި ޙާލަތު އޮޅުންފިލުއްވައިފި

ރައީސުލްޖުމްހޫރިއްޔާ ޑރ މުހައްމަދު މުއިއްޒު ޔޫއޭއީގެ ރައީސަށް ފޯނުން ގުޅުއްވައި އެގައުމުގެ ޙާލަތު އޮޅުއްފިލުއްވައިފި އެވެ.

މިކަން ހާމަކުރެއްވީ މިހާރު ރައީސް އޮފީހުގައި ކުރިޔަށްދާ ނޫސްވެރިންގެ ބައްދަލުވުމުގައި ރައީސްއެވެ. އެގޮތުން އެމަނިކުފާނު ވިދާޅުވީ މިހާރު މެދުއިރުމަތީގައި ކުރިޔަށްދާ ހަނގުރާމައާއި ގުޅިގެން ރާއްޖެ އޮތީ އަރަބި ގައުމުތަކާއިއެކުގައި ކަމަށާއި ދިވެހީންގެ ތާއީދު އެގައުމުތަކަށް އޮތްކަން އެންގެވުމުގެ މަސައްކަތް މިހާރު ކުރައްވަމުން ގެންދަވާ ކަމަށެވެ.

އެގޮތުން ރޭގެ ވަގުތެެއްގައި ޔޫއޭއީގެ ރައީސް މުހައްމަދު ބިން ޒައިދު އަލީ ނަހްޔާންއަށް ފޯނުން ގުޅުއްވައި އެގައުމުގެ ހާލަތު އޮޅުންފިލުއްވާފައިވާނެ ކަމަށް ރައީސް ވިދާޅުވިއެވެ. އަދި މިއަދުގެ މެންދުރު ފަހުގެ ވަގުތުތަކެއްގައި ހަމަލާތައް އަމާޒުވި އަރަބި އިތުރު 3 ގައުމެއްގެ ވެރީންނަށް ގުޅުއްވާނެ ކަމުގައި ވެސް ރައީސް ވިދާޅުވިއެވެ. އޭގެ ތެރޭގައި ސައުދީ އަރަބިއްޔާގެ ވަލީއަހުދު މުޙައްމަދު ބިން ސަލްމާންވެސް ހިމެނޭހެން ބަހްރެއިން އަދި ގަތަރުގެ އިސްވެރިންނަށް ގުޅުއްވާނެކަން ރައީސް ހާމަކުރެއްވި އެވެ.

ރައީސް ވިދާޅުވީ މިހާރު މެދުއިރުމަތީގައި ކުރަމުންދާ ހަނގުރާމާގައި ރާއްޖޭގެ ސްޓޭންޑަކީ އަރަބި އިސްލާމީ ގައުމުތަކުގެވެސް ސްޓޭންޑު ކަމަށާއި އެޔަގީންކަން އަރަބި ގައުމުތަކުގެ ވެރީންނަށް ދެއްވާނެ ކަމަށެވެ.

އަދި މި ހަނގުރާމާގައި ހަމަލާދެމުންދާ ތިން ގައުމުގެ އަމަލުތައްވެސް ދިވެހި ސަރުކާރުން ކުށްވެރިރާކުރާކަމަށާއި ރާއްޖެއިން ގޮވާލަނީ ހަނގުރާމަ ވަގުތުން ހުއްޓާލުމަށް ކަމަށް ރައީސް ވިދާޅުވިއެވެ.

އިރާނަކީ ނިއުކްލިއާ ހަތިޔާރު އުފައްދަމުންދާ ގައުމެއް ކަމަށާއި އެބިރު މުޅި ދުނިޔެއަށް އޮތް ކަމަށް ބުނެ އިސްރާއީލާއި އެމެރިކާއިން ދުނިޔޭގެ ގާނޫނު ތަކާއި ހިލާފަށް އިރާނަށް ވަރުގަދަ ހަމަލާތަކެއް ދޭން ފެށީ ހޮނިހިރު ދުވަހު ހެނދުނު އެވެ. އެގޮތުން މި ހަމަލާތަކުގައި އިރާނުގެ އިސް ލީޑަރު ޚާމަނާއީ އާއި އިރާނުގެ އަސްކަރީ ގިނަ ވެރިންތަކެއް އަވަހާރަކޮށްލާފައިވާއިރު މިކަން އިރާނުންވެސް އިއްޔެ ވަނީ ރަސްމީކޮށް އިއުލާނުކޮށްފައެވެ.

އެމެރިކާއާއި އިސްރާއީލުގެ މި އަމަލުގެ ސަބަބުން އިރާނުން ވަނީ އިސް ލީޑަރާއި އަސްކަރީ ކޮމާންޑަރުންގެ މަރުގެ ބަދަލު ހިފާނެކަން އިއުލާނުކޮށް އިސްރާއީލުގެ ގިނަ ސަރަހައްދުތަކަކަށާއި މެދުއިރުމަތީގައި ގާއިމުވެ ތިބި އެމެރިކާ ސިފައިންގެ މަރުކަޒުތަކަށް އަމާޒުކޮށް ހުއްޓުމެއް ނެތް ހަމަލާތަކެއް ދެމުންނެވެ. މި ހަމަލާތަކުގައި މަރުކަޒުތަކަށް ގެއްލުން ނުވާކަމަށް އެމެރިކާއިން މިރެއާއި ހަމައަށްވެސް ބުނަމުން އައި ނަމަވެސް އިތުބާރުހުރި މަސްދަރުތަކުން އަންނަނީ އެމެރިކާގެ މަރުކަޒުތަކަށް އެމެރިކާއިން ހީވެސްނުކުރާ ފަދަ ގެއްލުންތަކެއް ވަމުންދާކަން ހާމަކޮށްފައެވެ.

މިގޮތުން އެމެރިކާގެ އެންމެ ބޮޑެތި އަސްކަރީ މަރުކަޒުތައް ހުރި ޔޫއޭއީއާއި ގަތަރާއި ކުވެއިތު އަދި ބަހްރައިނަށް ވަރުގަދަ ހަމަލާތަކެއް ދީ އެގައުމުތަކުގެ އާންމު ދިރިއުޅުންވެސް ވަނީ ހުއްޓުމަކަށް އައިސްފައި އެވެ.

އިރާނުން ވަނީ މި ހަމަލާތަކަކީ މެދުއިރުމަތީގެ އެކުވެރީންނަށް ދޭ ސީދާ ހަމަލާތަކެއް ނޫން ކަމަށާއި މިއީ އެމެރިކާއާއި އިސްރާއީލުގެ ތަންތަނަށް އެކަނި އަމާޒުކޮށް ދެމުންދާ ހަމަލާތަކެއް ކަމަށް ބުނެފައި އެވެ. އެގޮތުން އިރާނަށް ހަމަލާތައް ދޭން އެމެރިކާއިން މި މަރުކަޒުތައް ބޭނުންކޮށްފައިވާކަމުގެ ހެކި ހުރި ކަމަށާއި އިރާނުން އަމިއްލަ ދިފާއުގައި ދޭ މި ހަމަލާތަކަށް އެގައުމު ތަކުން އިޖާބަ ނުދިނުމަށް އިރާނުން ވަނީ އެގައުމުތަކަށް އަންގާފައި އެވެ.